|
TURKETİ DO OKORTURAŞİ VİZAPE KEİZDİNU
Turketi do Okorturak artikarti muşişi dobadonamşinepes viza ok’itxuşi dulya doçodines. Amuşk’ule jur tereşi dobadonamşinepes artikartişa 90 nğdaşakis oxtimu do moxtimu şeni vizaş yeç’op’inu var dvaç’irasunon. Turketis temaşi oçkinapuşi 2006/9939 nomeroni ak’t’i, ma-26-ani 3’anağani 2006 tariğoni do 26061 nomeroni ofi3iuri gazetis iç’arinu. Turketi do Okorturaşi Resp’ublik’apeşi Hukumetepeş şkas na ixvenu ak’t’iten jur tereşi k’ult’uruli, ek’onomik’uri, t’urist’ik’uri do k’omer3iuluri speropes na ren k’ont’akt’epe na rt’uşen met’i irdasunon.
Amuşen 3’oxle jur tereşi şkas artikartişa na nulunan k’oçepek 15 ndğa şeni 15 Amerik’anuli dolari meçapt’es do eşo nulur do mulurt’es. Edo sinorişi nek’nas ar k’eleşen majurani k’eleşa oxtimu do moxtimu dido meç’ireli iqvet’u.
Amuşk’ule majura terepeşa na idasunon magzalepe 90 ndğa şeni viza var yeç’opasunonan do am ora şeni dodgituşi hak’k’i uğut’asunonan. Mara am p’eriodişen ginz’e dodgitu na unonanpek, 3’oxleni k’anonişi hukmepeşa naqonasunonan. Jur tereşi şkas na ixvenu ak’t’iten xususuri vizapeşi xarcepe 50 Amerik’anuli dolarot k’arari niçinu mara am pasi jur k’eleşi rizobaten goktiru iqvasunon.
|
TÜRKÇE
