|
EÇİ 3'ANURİ EFORİ: BAYAR ŞAHİN
Çinoberi xalk’uri gemabire Bayar Şahinişi musik’uri skidalas eçi 3’ana kogolaxtu. 1965 3’anas Maç’axelis na dibadu Bayar Şahinik 1977 3’anas Mp’olişa dibargu. Nana nena muşi Kortuli na ren Bayar Şahinik Turkuli Folk’loruli İnst’it’ut’is do Mp’oliş Universit’et’işi Oxen3aluri K’onservat’uaris ik’itxu. 1993 3’anas St’udio Bayşah do 2001 3’anasti Bayşah Muzik coxoni k’amp’aniape k’i’du.
“Xoronişa Ocoxinu”, ”İxişa” do “Bani” coxoni albumepe na gamoçkvu Bayar Şahinik muşi birabapes p’olifoniuri t’radi3ia oşinaxu şeni, toli-gon3’k’imeri dgin. Xalk’uri birabapes panduri, çonguri, duduk’i, garmoni, salamuri, çonguri dabali bani, doli, darç’ello kemance, ç’ip’oni, baglama steri xalk’uri inst’rument’iti ixmars.
Turketişi çkvaneri svalepes na skidun Kortuepeş oşkendas mcveşi t’radi3ialuri xalk’uri birabape na k’orobups Bayar Şahinik, çkar na var goç’k’ondun ar şina muşi aşo mi3’umernan: “Xendek’işi Lutfiye coxoni oput’es tis na momixtu ar şina var gomaç’k’ondinen. Oşidoxut 3’aneri Yusufi p’ap’uli, otxoneç 3’aneri Logori Ahmet p’ap’uli, sumeneçdovitoxut 3’aneri Ali Faik p’ap’uli, sumeneçdovitoxut 3’aneri Dursun p’ap’uli do sumeneçdovitoxut 3’aneri Muhittin p’ap’uli, qoroperi megabre çkimi İberya Ozkan Melaşvili do p’rofesori Şuşana Putkaraz’e k’ala na vort’it ar oxoris, ginz’e seriş morgvalis na vusiminit birabapeşen Turketuri Kortuli musik’aşi xampoba k’aixeşa mevagni. Ok’uleti, çkimi oput’e na ren Maç’axelis, İberya k’ala, p’olifoniuri xalk’uri birabapeşi k’erk’elişen na p’k’orobit birabape Okorturas na var skidut’u oxovo3’oni. Raxmetoni Ahmet Ozkan Melaşvili k’ala ğuru yado na miçkit’u ar t’radi3ia xolo na skidut’u, maartani farot Maç’axelis tolepe çkimiten kobz’iri.”
Turkuli, Kortuli, Margaluri do Lazuri birabape 3’oxle oqopinot, xalk’uri birabapeşi xampa rep’ert’uari na uğun Bayar Şahinik, na ibirs birabapeten Turketi do Okorturaşi megabroba do xalk’epeşi cumalobas mteli menceli muşiten mxuci meçaps.
|
TÜRKÇE
