|
P'OLİT'İK'URİ AR GAZETA: GALİ
Lazuri nenaşa irişen xolosoni nena na ren Margaluri, Soviet’uri p’eriodis 3’oxle na içinu do ok’ule na moivarinu bedigoç’veri ar nena ren. 1930-oni 3’anapes Okortura do Apxazias na skidut’es Margalepe şeni K’azaxişi Gazeti, Samargaloşi Çai, Narazenişi Çai, Samargaloşi Tutumi, Maxorxali do K’omunari steri gazetape Margaluri oqopinot gamiçkvineet’u mara Soviet’epeşi moivaroni p’olit’ik’apeşi sebebiten gamoçkvinu dodgitineet’u.
Margaluri, Apxazias do Samargalos skidalas dominant’uri oqopinot na iğarğalinen ar nena rt’u. Margaluri nenas gurapa do oambaruşi hak’k’epe var duskidu mara andğaneri ndğasti xolo didopeten iğarğalinen. Margaluri, Apxazias Rusulişk’ule irişen dido na iğarğalinen majurani nena oqopinot skidun.
Apxazias Margalepe didopeten na skidunan omjore regioni na ren Galis ar gazeta gamiçkvinen. Gali na coxons am p’olit’ik’uri gazeta Apxazuri, Rusuli do Margaluri nenapeten gamiçkvinen. Gali 1990-oni 3’anapeşi çodinaşen andğaneri ndğaşakis ç’eşidoni p’eriodepeten gamiçkvinen. Gazetas Apxazuri do Rusuli K’iriluri boncapeten, Margaluri Kortuli boncapeten iç’aren.
Redak’t’oroba muşi Nugzar Salakayak na ikips gazeta, t’abldoturi formas otxo gverdi oqopinot 1.000 t’irajiten gamiçkvinen. Gazetas ambarepe, p’olit’ik’uri k’oment’arepe, ist’oriuli-k’ult’uruli-t’urist’ik’uri temapeşi ç’arape, int’erviupe, leksepe, mk’ule p’aşurape, anek’dot’epe Margaluri oqopinot iç’aren. Margaluri na skidun do na iç’aren ar nena ren yado o3’iraps Galik irixoloşa. Cuma nena Margaluri gazetapes do jurnalepes iç’aren do xoloti iç’arasunon.
|
TÜRKÇE
