DUDBUT'K'A

JAP'ONİŞİ NOÇ'ARE GRAMERİ: LAZ GRAMMAR

Lazuri nena do k’ult’uraşa beciti xenape na meçu Chiviyazilari Gamamçkumalobaşi Seria Mjoraşen 2003 3’anas, “Lazca Gramer / Lazuri Grameri / Laz Grammar” coxoni svara gamiçkvinu. Svara, Goichi Kojima - İsmail Avci Bucaklişişi coxopeten gamaxtu. Svaraşi İnglisuri oxo3’onapapeti Goichi Kojima do Eylem Bostancişk’elen ixvenu.

Am gramerişi ge3adati, 2002 3’anas na gamiçkvinu majura ge3ada na ren “Lazuri Nenaçkina” steri, Turketuri Lazepeş gramerişi dvaç’irobas ç’it’a na rentina nargu. Juri xolo gramerişi ge3adati, Lazuri nenaşi oxamputen gurapa, radio, t’elevizia, gazeta do jurnalişi nena oqopinot oskedinuşa mxuci meçamuşen dido mendra ren. Aşo na renantina Lazuri nenaşi grameri coxo gedvaluten do Lazuri nenaşi grameri oqopinuşi iddiaten gamaçkvineri oqopinu mutepeşi dido ar ubediloba ren.

Go3’otkvala muşis, “A3’i xes na giğunan Lazuri gramerişi svara, dido 3’anaşen doni speroluri goşogorapeten na ixvenu do andğaşakis Lazurişi jin na ixandinu irişen amak’ateri xanda ren.” steri iddia na ikips gramerişi ge3ada, 1910 3’anas N. Marrişi “Gramatik’a Ç’ansk’ago (Lazsk’ago) Yazik’a” coxoni Lazuri gramerişi xandaşenti dido dork’inobape uğun. Na nirgu odudepe umolaşinu, udvaç’iruli oqopinot İnglisuri oxo3’onapape oç’aru do İnglisuri nena u3’ori oxmarinu, Turkuli oxo3’onapapesti çilatape oxvenu, udvaç’iruli do u3’ori temapeten mak’itxalepeşi şuri nondarinu, şive do dialekt’i steri k’onsep’t’epe u3’ori oxmarinu, Lazurişi ubecitoni şivepeşi çkvanerobape dido beciti na ren steri o3’iramu do tişen ağani şivepeş geğumu svaraşi iptinerot na iz’iren u3’oriloba do dork’inobapeşen namtinepe renan.

“K’arta oput’eşi oğarğalu muşebura ar nenaşi sist’ema ren.” yado osimaduten gramerişi xanda var ixvenen. Gramerişi xanda oxvenus, linguist’ik’uri çkina, nananenaşi k’ai oçkinu do nananena omordinuten oskedinuş idealişi mance oqopinu dvaç’irs. İdealuri ar Lazuri grameris, Margali nenaşçkinerepeşi do cuma nena Margalurişi mxuci meçamuten oxazirinu dvaç’irs. Arxvala aşoten, irik k’abuli na qvasunon; gurapa, radio, t’elevizia, gazeta do jurnalişi nena aşopeten yeçkindinen.

Ok’vanduşi t’ilifonişi nomeri: 0216 414 91 13



                                                                                                                                                              TÜRKÇE