DUDBUT'K'A

MİNİAT'URİK İST'ORİA OTANAPS

Miniat’uri, dido mç’ipe şveri do ar k’eleni suratepes na niçinen coxo ren. Gamamçkvala na var t’u mcveşi p’eriodepes svarape xeten iç’aret’u. Miniat’urepe am svarape o3’ipxu şeni ixmarinet’u. Oşkenduri p’eriodişi Avrop’as xeşnoç’are svarapeşi gyoç’k’aşi boncape mç’ita peroni ar çistiten imskvanet’u. Am dulya şeni dido mskva mç’ita peri na meçaps do Lat’inuri coxo muşi “miniumi” na ren k’urşunişi ok’sidi ixmarinet’u.

Tkvala miniat’urişi odude Gyulvaluri ren. Osmanuri ç’areli odudepes svaraşi suratis “nak’işi”, “t’asviri”; miniat’urişi mesuratesti “nak’k’aşi”, “musavvari” steri t’erminepe ixmarinet’u. Osmanuri miniat’urik ar k’ele k’lasik’uri İslamiuri miniat’uriş st’ilişi meandere na rt’u Selçuk’urepeşen, majura k’eleti Mp’olişi amak’atutenti Gyulvaşi k’ult’uraşen namtini pasepe ezdu. K’lasik’uri İslamiuri svaraşi xeşnoxvenobaşen p’eriodiş doloxe na ok’ui3’k’u miniat’urişi xeşnoxvenek, dudp’axi Sinani, Kapidağluri K’onstant’ini, Levni do Memat’rak’e Nasuxi steri ust’apeşi xeten minoba muşis nunç’işu.

Sult’ani Masumani Mexmedişi xemoşletinerobaşi 3’anepes, Osmanuri miniat’urişi xeşnoxvenobas k’lasik’uri p’eriodişen am3ikalurot çkvaneri st’ilişi k’valifik’a3iape uğun. Sult’ani Muratişi guri şeni, oxazirinus na geiç’k’u anşi cildoni Siyer-i Nebi coxoni ansik’lop’edişi doloxe, oşepeten miniat’uri iğarinu. Miniat’urepeşei temape generalurot, mcveşi avi do ok’ok’idinuşi saxnepe renan. Xenape na uğun dok’ument’uri k’valifik’a3iak miniat’urepeşa ist’oriuli odude oqopinuşi k’valifik’a3iati meçaps.

Nak’k’aşi na itkven meminiat’urek, mtelot pambuğişen noxvene ar k’art’alişi jin 3’oxle sureti muşi na qvasunon ondişi naxazepe gyoğarups. Edo naxazepe diçodanşi, sinorepeşi ğarape çinişi murek’k’ebiten oşek’ilaps do oçodinaps. Emuşk’uleti ğarapeş oşkendas doskidineri burmepe mcxu furç’aten 3’orulot içistinen. Edo ğocişi ğarape xolo çinişi murek’k’ebiten iğarinen. Mcveşi orapes, miniat’urepes cincuri çistepe ixmaret’u. Miniat’uerepe xvala k’art’alişi jin var, filişk’ibiri do qvilişi jinti iğarinet’u.



                                                                                                                                                              TÜRKÇE