|
SAAK'AŞVİLİŞİ TURKİAŞA GAZİŞİ MOK'İTXA
Okorturaşi P’rezident’i Mihail Saak’aşvilik, Rusia k’ala na uğunan gazişi k’rizişa çare ogoru şeni Turkia moik’itxu. Rusia k’ala na uğunan p’olit’ik’uri k’rizişk’ule a3’iti gazişi k’rizi k’ala na iboden Okorturaşi imendi Turkia ren. Rusiak 3’anağanişi goç’k’as gazi na nuk’vatasunon Okorturak, qinoraşi oşkendas ugazuri var dopskidat yado Turkiaşen şvela çumers. Okorturak, Rusiak xolo gazi gamamiçan yado Turkiaşa memişvelit ya u3’umers. Okorturak, Turkiak doloxe muşis oç’u do Avrop’aşa oncğonu şeni na ixmarasunon do Okorturaşi dixapeşen na golulun Şahdenizişi xatis k’ot’a muşişi monz’inu ak’vans.
Azerbaycanişen gazi na tirasunon xati 3’ilvaş tutas guin3’k’asunt’u mara var nuç’işu. Azerbaycanis, Rusiaşen gazi na var yaç’opasunon şeni Turkiaşa gazi gamaçamu var unon. Rusiak, Azerbaycani k’ala Okorturaşa na gamaçaps gazi ağani 3’anaşi goç’k’as mep’k’vataminon yado ognapu. Mutepeşi oxmaru şeni gazi na gorupan jur terekti Turkiaşa na itirasunon Şahdenizişi gazi çumernan.
Gazişi dvaç’iroba şeni alt’ernat’iuri energia na gorups Okorturak, 2007 3’anas gazi Turkiaşen eç’opasunon. Okorturak, mtelot 1 milyari do 800 milyoni met’rok’up’i na dvaç’iren gazişi 800 milyoni met’rok’up’i k’onari, 2007 3’anas Turkiaşen na eç’opasunon Azeruli gazi ixmarasunon yado oxo3’onapu. Turkia do Okorturaş oşkendas na ixvenu gazişi ak’t’i k’ala, Okorturas gazi eç’opinuşi ğirsi dvark’inasunon do Rusiaşa na uğun mek’iroba muşi im3ikanasunon.
Na guişinasunon steri Okorturak, Rusiaşi gaziş monop’oli na uğun Gazp’romişi gaziş ğirsi jur fara monz’inuten, 1.000 met’rok’up’i şeni 110 dolarişen 230 dolarişa enç’uşi ok’vanduşa p’ozit’iuri coğabi var meçeret’u. Gazp’romik, 2005 3’anaşi çodinas gazişi oğirsuşi temas mengaperi ar p’olemik’a Uk’raina k’ala qveret’u do Uk’rainaşa gazi meçamu mek’vateret’u. Aşo oxvenuten, Rusiak energiaşi speros ti-muşişa mek’ireli na ren manz’agerepes yontxaps do uoxva3’onoba ğirsişi sebebiten iz’irentina mtinurot p’olit’ik’uri simadapeşi çkvaneroba o3’iraps yado k’oment’ari ixveneret’u.
|
TÜRKÇE
