DUDBUT'K'A

MAXARE AR MEAVE: SİFTERİ

Uçazoğaşi t’erit’orias na skidunanpek sifteri do emu k’ala meavoba dido qorapan. Emuşeniti sifteri, birapa do mskva ğarğalapeşi tema nikteen. Am t’erit’orias na skidunan xalk’işen mutu na var uçkinanpes, xalk’ik sifteri qvilups do imxors ya a3’onenan. Mara sifteri na qvilups k’oçi, p’at’i k’oçi işinen do megabrepe muşişk’elen k’erk’elişen itxozinen. Sifteri muşi na ğurun k’oçepek imgarnan ndğalepeşi morgvalis. Aşo k’ap’et’i ren sifterişi qoropa t’erit’oriaşi xalk’iş doloxe. Aşo ar qoropa na omç’unan xalk’işi xali majura t’erit’oriapeşi xalk’işk’elen k’aixeşa var oxoi3’oninen. Mesifteroba k’ala na iboden mitxanik am dulya şeni na xarcups geç’areli, ora do menceli dido ren. Mara am avişen na moigen xor3i dido ç’it’a iqven. Ati o3’iraps, sifteriluri avişa xor3i şeni var, keifi oxvenu şeni ilen. Sifterişi meavoba geç’areliten na izominen ar dulya var ren. Mariaşinaşi tuta moxtaşi, mesifrerepek na ixandept’es fabrik’apeşen izni eç’opupan do gverdi mşkironeri gverdi z’ğeri germapeşe eşulunan, sifteris meqoneri gulunan.

Sifteri, ç’it’a maxare k’erk’elişen do emigrant'i na ren k’vinçepeşen ar teri ren. Lat’inuri coxo muşi “Accipiter nisus” ren. Mok’irk’oleri k’ik’ili, mok’irk’e ç’angepe do menceloni msvape muşi k’ala meave ar k’vinçi oqopinot işinen. Kianas jureneçdovit çkvaneri ç’eşidi muşi skidun. Ç’it’a do oşkenduri k’vinçepe na ç’opupan ç’eşidepeşa sifteri, umosi didi k’vinçepe do buz’oni skindinape na ç’opupan ç’eşidepeşa çak’irişi k’vinçepe itkven. Turketis normaluri sifteri, çak’irişi k’vinçi do gri peroni sifterepeşi ç’eşidepe skidun. 3’una do biç’iş ç’eşidepeşi oşkendas didilobaşi çkvaneroba iqven. Biç’epeşi msvape nanç’inerot 62 sant’imet’ro, 3’unapesti 74 sant’imet’ro k’onari ren. Biç’i muşi 3’una muşişen xuraşi didiloba oqopinot ç’it’a iqven. Biç’epeşi monk’anoba nanç’inerot 150 grami, 3’unapeti nanç’inerot 240 grami k’onari ren.

Sifteri, arm3ika mk’ule, k’un3’uli muşi morgvali msvaepe do ginz’e k’udeli muşi k’ala zirmiç’uri manevrape oxvenuten avepe muşi ç’opups. Ntxalari, 3’i3’ila, mjvabu, mtugi do ç’it’a k’vinçepe oç’oputen skidun. Dido meave k’vinçi na ren sifteri isinci steri ren, astaxolo noğira muşişa meç’işun. K’ap’et’i ç’angepe muşiten avi muşi ç’opups. Kianas avi muşi sifterişen umosi ust’alobaten na ç’opups ar k’vinçi var ren. Mçire tipepuna do st’ep’epes, uncaloni 3’k’aroni dixapes do kvalepunapes var do but’k’a na dobğaps gon3’k’imeri do motvaleri ncalepunas, ncaloni st’ep’epes, ncaloni do 3xik’epunaşi sinorepeşen ok’orteri agronomiaşi dixapes avepe muşi ç’opupan. Oç’opuşi dixapeşen umosi ncaloni svaepes imralenan.

Sifterik Avrop’a, Azia do Afrik’aşi mt’k’uri regionepes skidun. Mariaşinaşen Gimuaş tutaşi çodinaşakis oçildre şk’elen omjore k’eleşa do qinoraşi morgvalis, omjores skiduşk’uleti İgrik’aşen Mbulobaşakisti omjore şk’elen oçildre k’eleşa putxunan. Stveliş emigra3iaşi oras, sifterepek Oşkenduri Avrop’a, Oşkenduri Ruseti do Omjoregyulvaluri Aziaşi mt’k’alepeşa putxunan. Am emigra3iapeşi p’eriodis, Turketişi yulva do gyulva sinorepeşa xolosoni na ren jur gzaten putxunan. Entepeşi maartani emigra3ialuri gza: Alp’epeşen geç’k’uten Adriat’ik’işi zoğap’icepe, Grek’ia, Yulvari T’rak’ia, Mp’oliş rubaşi omjoreşk’ele gyulunan. Entepeşi majurani emigra3ialuri gza: Oşkenduri Rusetişen geç’k’uten K’avk’asiaşi germapeşi gyulva oktepeşi gzaten Uçazoğaşi zoğap’icepeşen putxunan. Uçazoğaş germapeşi gzaten omjoreşk’ele gyulunan.

Am meavoba, didopeten Lazepeşk’elen ixvenen. Map’avre, Otina, Art’aşeni, Vi3’e, Arkabi, Xopa, Noğedi steri noğape am meavoba k’ala işinen. Mara Turketiş gyulvari regionepeşa na dibarges xalk’ikti, ora z’iranşi mesifteroba ikipan. Aya arxvala meavoba var, xolo eşo sp’ort’iti ren. K’ap’et’i na renan şeni, meavobas 3’unape ixmarinen. Meavoba şeni ağandobaderi, ar 3’anaşen ç’it’a na renanpe ixmarinen. Entepes çkar mutu na var uçkinan şeni, entepeşa oguru do k’oçişa oxvamç’k’inu perpu iqven. Aşopeten sifterik dulyas nirgen. Meavobas toli na uğun sifteri oxoi3’oninen mance muşişk’elen do meavoba şeni iskedinen.



                                                                                                                                                              TÜRKÇE