DUDBUT'K'A

ÇİNİK, BİNAPE ESTET'İK'A NOKTAPS

Çinişi t’ermini generalurot, arkit’ekt’uruli binape şeni ixmarinen, normaluri skidalas na ixmarinen angepeşati k’eramik’a itkven. Tkvala “çini”, bonca “i” şen omraleri na ren şeni iptineri menda3’k’omilus maçiniloba Çinişen moxtimeri ren yado oxoi3’onen. Maçiniloba, xeşnoxvenuri ist’oriaşi eksp’ert’epeşk’elen Osmanurepeşi ar xeşnoxvene ren yado k’abuli ixvenen. 18. oş3’anuraşakis arkit’ekt’uras na ixmarinu çinis “kaşi” do çinişi angi, vazo, kasesti “evani” itkvet’u. Em p’eriodis, Çinişen imp’ort’i xveneri p’orselenepe çinoberi iqvesşi, Osmanuri noxvene “kaşi”şi mskvanoba do k’ap’et’inoba o3’iru şeni, emus “çini” otkuşa geiç’k’ineren.

Oşkenduri Azias na imordinu k’eramik’aş xeşnoxveneşi ar t’ot’i na rt’u maçiniloba, Selçukurepek Anat’oliaşa muğes. Osmanurepeşi arkit’ekt’uruli mo3’ipxaş xeşnoxvenes dido beciti na rt’u çini, came, medrese, turbe do sarayepe mo3’ipxu şeni ixmarinu. İptineri Osmanuri p’eriodişi çinepe, Selçukuri t’radi3iaş meqoneri ren. Figuriloni geomet’riuli ç’ara, mzgudaluri mo3’ipxape k’ala skit’a, jvari perepe çkvanerot ixmarineren. Bizansurepeşi p’eriodis, k’eramik’aşi ok’rebule na rt’u İznikik, Osmanuri İmp’eriaşi p’eriodisti irişen beciti çinişi ok’rebule oqopinot, 14. oş3’anuraşen 18. oş3’anuraşakis becitoba aqveren. 17. oş3’anuras becitoba muşi na var doskidu İznikişi at’elyepe k’ala Kutahyati, İznikişi t’eknik’a var aqutina, 15. oş3’anuraşen doni ar çini, k’eramik’aşi ok’rebule oqopinot skideren. Kutahyaluri k’eramik’ape ren cğat’a, mç’ita, skit’a, monoğe, jvari peroni.

18. oş3’anuras, t’erit’orialuri k’valifik’a3ia na uğun Çanakkaleşi k’eramik’ape gamaxteren. Osmanuri p’eriodis, didopeten sarayi, came, medrese do turbepe mo3’ipxu şeni na imralinu k’eramik’ape, 17. oş3’anuraşk’ule ok’uxvus kogyoç’k’eren. Resp’ublik’uri p’eriodişakis Kutahya, Çanakkaleşi k’eramik’epe do ç’anç’axi muşi Fransiaşen moğapinuten na ixvenen Yildizişi p’orselenepe iz’iren. 18. oş3’anuras, maçinilobaşi xeşnoxvene mtelot nik’arberen İznikis. Artneri oş3’anuras dido mskva modelepe na omralu Kutahyaşi çinilepek, em oş3’anuraşi çodinas dork’inus gyoç’k’eren do 19. do 20. oş3’anurasti mcveşi İznikişi çinilepeş mot’ifepeşi k’op’ia nikteren. Andğaneri ndğas çinişi ok’rebule Kutahya ren. Ekonaşis didopeten Selçukuri peri do mot’ifepe o3’uruten çini imralinen.

Çiniş mo3’ipxaşi xeşnoxvene k’ala peri, dido peroni oqopinot arkit’ekt’uraşa na ik’aten ar mskvanoba ren. Çiniş xeşnoxveneşi namtini k’valifik’a3iape aşo ren:

- 900°C k’onari t’u3anoba na uğun furnepes na igiben çinişi levxape çini, mo3’ipxaşi irişen uoğuruloni element’i noktaps. Çinişi jin na iz’iren mo3’ipxa, deseni oqopinot uçodinobaşakis skidun.
- Tudendo na iz’iren quartzi steri maddepeşi goşobğinuşi xeten xonari absorbi ikips.
- Sirişi t’abak’as na uğun meğalobaşi k’valifik’a3iaten xonaruli solağanepeşi homogenuri goşobğinuşa gza meçaps.
- K’omp’ozi3ia muşis na ixmarinen malzemepeşi xeten t’u3anobaşi dork’inu dodginaps, doloxe mutepeşis na ixmarinen binapes, monç’inoras grili do qinorasti t’ibu okaçuten şuri oşvanapaps.
- Sirişi t’abak’apes na uğun cğat’alobak, arm3ika te absorbi oxvenuten sirişi tudeni perepe çxant’oni do cğat’oni o3’iraps do te 3’orilot meğalinaps. Çinik, na nin3axen binape na renanşen mçire, mağali do feraxi o3’iraps.
- Jin muşis 3’k’ari var okaçaps, bakt’eria var yeçkindinaps do omt’k’orus gza var meçaps.
- Çinilepes na ixmarinen çistepeşi k’omp’ozi3iape, oş3’anurepeşi morgvalis cğat’aloba muşi oşinaxu do originali muşişa irişen mengaperi steri formule oxvenuten gverdi pasoni kvaepeşi perepe meğalups.