|
XE3ALAŞİ SİMBOLİ: LOMİ
Lomi ren k’at’ularepeşi (Felidae) familiaşen. Xor3i na imxors buz’oni 3xovarepeşi ar sort’i ren. Lomepe, filmepe do k’arik’at’uruli romanepeşen na vigurit steri, p’eci mt’k’apes va skidunan. Ekonaşis oskidu var mo3’onan. Ginz’e tipepe na uğun, arm3ika ncaloni, gon3’k’imeri dixape qoropan. Mcveşi orapes Avrop’a, Azia do Afrik’as skidut’es. Andğaneri ndğasti, Afrik’aşi oşkenda, yulva do omjore t’erit’oriapes skidunan. Aziasti açkva lomi var skidun. Xvala Hindist’anişi eyalet’i Gucaratişi Giri coxoni mt’k’as, dido ç’it’a nak’onoba na uğun Aziaşi lomi skidun. Lomi skidun nanç’inerot 15 3’anaşi morgvalis. Murenki zoop’ark’epes nanç’inerot 30 3’anaşakis na skidun lomepeti koren. Entepeşi oskidinale mtelot xomuloba ren. Dido menceloni do gurami ar 3xovari na ren lomi, mt’k’apeşi lomi oqopinot içkinen do eşoti coxo geidvinen emus.
K’ap’lani şk’ule irişen didi do menceloni 3xovari ren. Ginz’enoba muşi k’udeli muşi k’ala, sum met’ro k’onari ren. Mağaloba muşiti nanç’inerot ar met’ro ren. Monk’anoba muşi, nanç’inerot 250 k’ilo k’onari ren. Omğoru muşi, 4 km mendraşenti ignapen. Qva muşi mçire ren. Çenge muşi dido menceloni ren. Skit’a mk’ule do elakteri bundğaloni ren. K’udeli muşişi k’un3’uli pun3kuloni ren. K’oçi lomis dudişi gomorgva, ginz’e do epto mskva ar çoçok’aten me3’opxeri uğun. İşumaşi, am çoçok’a dobarups. Seris avişa ulun. Nena muşi didi do daz’i steri k’ap’et’i p’uzurepeten motrageri ren. Am sebebiten avi muşi loskupt’aşi, avişi t’k’ebi do qvilepeşi xor3i goşimers. Leşiti imxors. Lomik leop’ardi, sirt’lani, mgeri steri majura maxare 3xovarepeşi avepeti nuxirs. Ant’ilop’i, mskveri, imp’ala, mt’k’uri puci, zebra do zurafa steri 3xovarepe renan muşi dudarot avepe. K’oçi lomi, mşkironeri var t’asşakis, avişa var ulun. Avi 3’una lomik ikips. Murenki k’oçi lomik imxors avi maartanot.
Omzik’uşi sezonepe çkvaneri uğun. Ar ndğaşi doloxe nanç’inerot 50 fara imzik’ernan. 3’una lomi, omzik’obaşen nanç’inerot 110 ndğa şk’ule, ar faras sumişen anşişa motali dorinaps. K’oçi lomik arçkva 3’una koz’iraşi, emus 3’oxleni kimoliş noxvene motalepe uqonun na, oğurinaps. Lomis dibadaşi nanç’inerot jurdogverdi k’ilo k’onari monk’anoba aqven. Ağandobaderi motalepeşi tolepe genk’ileri iqven, maartani jur doloniş morgvalis. Nana lomik motalepe muşis sum tuta k’onari mja oşvapaps. Lomepe iqven k’ai nana do baba motalepeşa. Entepe qoropan do inç’elnan.
Ocağişi mtel 3’unapek nanaloba ikipan motalepeşa. Motalişi dudi do k’uçxepe renan ç’ereloni do k’ap’ula do k’udeli muşiti ren mçireloni ğvaroni. Ora mek’ilaşi, am lekepe gondunun. Sum 3’aneri iqvanşi, biç’i motalepes gamulun çoçok’a mutepeşi. Nana do babak motali lomi sum 3’aneri iqvasşakis çumers. Biç’i motalepek, sum 3’aneri iqvasşi, ocağişen ok’o3’k’oni renan. Ti-mutepeşi ocaği p3’ipxupan. 3’una lomepek, mtelot na dibades ocağis skidunan. K’oçi lomepes ar faras 45 k’iloşakis do 3’una lomepesti 25 k’iloşakis xor3i aç’k’omernan. Murenki 3’orot, ar ndğas nanç’inerot 8-10 k’ilo xor3i imxornan.
|
TÜRKÇE
