DUDBUT'K'A

EVLİYAPEŞİ DİXA NA REN OPUT'E: P'ANÇ'OLİ

P’anç’oli, Xopaşi xolos na geladgin do Xopaşa na gelo3’k’en dido qoroponi ar oput’e ren. Mç’k’ila do Cixaş germapeşi vadepeş morgvalis okti ar dixas dobargineri na ren, artikartişen mendra k’ideri oxorepe na uğun, jvariş perişi irişen mskva tonepe dixape muşis na gyoz’in, Lazepeşi t’ip’iuri ar oput’e ren. Doloxe muşişen na gamaxtu religiuri çkinerk’oçepeşi sebebiten “Evliyapeşi dixa” oqopinot molişinen. Xopaşi noğaşa 4 km mendranoba na uğun P’anç’olis nanç’inerot 50 ocaği ren do 250 k’onari adami skidun. Monç’inoraş tutapes am nak’onobas manz’inen. Ofi3ialuri nena muşi Yeşilkoy ren. Jilentunaşk’ele K’ise, 3’alentunaşk’ele Buçe, yulvaşk’ele Anç’oroxi do gyulvaşk’ele Peroniti k’ala gok’ireli ren.

Oput’eşi dixape nanç’inerot % 60-70 k’onari okti ren do arxvala agronomia oxvenuten na skidun ar oput’e şeni dido meç’ironi ar geografia uğun. Oput’eş mogapaşi irişen didi odudepe çai do txirik 3’opxups. Adamepek, t’abiat’işi meç’iroba, 3’anapeş doloxe mogapaş odudepeşi udobağinoba do mağali gamantanu steri sebebepeten Zonguldak, Akçokoca, İzmit, Golcuk, Yalova do İstanbul steri noğapeşa mendaxterenan. P’anç’olis gza, 3’k’ari do elek’t’rik’aşi p’roblema var uğun. Ovro 3’aneri n3’opinaşi p’eriodi şk’ule oput’eşi n3’opula, muşi dobağineri mamgure var ren yado geink’ilineren. Oput’es came ren mara şursağobaşi oxori var dgin. Muxtarobaşi bina do çai eç’opinuşi ok’rebule kuğun. Majura oput’epes na ren steri, çai eç’opinuşi ok’rebule ç’andaşi saloni do k’ult’uruli ok’rebule oqopinot ixmarinen. Oput’eş xalk’işi n3’opinoba mağali ren do universit’et’i oçodineri dido P’anç’olurik, Turkiaşi çkvaneri noğapes ofi3ialuri do xususuri dulyapes ixandeps.

Oput’es 3’anaşi namtini orapes k’armaxaşi; Mariaşinaşi tutasti sifterişi avi ixvenen. Mara oput’eşi ğalis dido na skidut’u mç’ita point’oni k’armaxapes na dvark’inu şeni, muxtarobaşk’elen oçvaluşi p’rograma xveneri ren. Koydesişi p’roje k’ala, mç’ima do ğvarişi 3’k’arepeşen na yepups ğalis nidgitinas yado sum svas 55 met’ro ginz’enobas do 6 met’ro mağalobas bet’onişi k’ida ixvenu. Aşoten P’anç’oli ğvarepeşi zararepeşen na muşlitasunon steri oput’eşi tude na go3’adgin K’iseti ğvarepeşen komuişletinu.

Dixape muşi; Balaxina, Zenimele, K’ot’ili, Nebağule, Obicana, Op’urmole, P’at’işt’oba, T’abo, T’aç’k’uri, Çexçina, Dimit’ali, Kvandidi, Op’umuğali, Kvamostomeri, Zelik’alani, Nosuğeni, Bağade, Oktisari, Zelena, Metibci, Golaktoni, Mşkena, Mşkelepuna.

K’erape muşi; Faneşi, Ezirişi, K’aralişi, Ç’anişi, Tofik’işi, Bekarişi, K’oincişi, Dolapçişi, Soğuişi, Alçiyaşi, Meksudişi, Nesimişi, Omeç’ut’aşi, T’at’ibaşi, Oksuzişi, Ketuişi, İmamişi, Mamudişi.



                                                                                                                                                              TÜRKÇE