DUDBUT'K'A

DEVEŞK'VİNÇİK NA PUTXUN STERİ UNK'AP'UN!

Deveşk’vinçi ren “Struthio camelus”işi familiaşen. Afrik’aşi cinconi ren. Deveşk’vincis askedinen 50 gradusi mçxvapas do 35 gradusi qinobas. Na var aputxen ar k’vinçi ren. Xes na ren çkinapeşi toliten, k’vinçepeşi irişen didi ren yado isimadinen. Kianaşi k’arta sotxanis iskedinen. Ginz’e ar qali do xolo ginz’e t’rikepe uğun. Ar saat’is nanç’inerot 65 k’ilomet’ro ank’apinen. Deveşk’vinçepes aqven 90 k’ilogramişen 130 k’ilogramişa monk’anoba generalurot. Namtini kimoli deveşk’vinçepeşi monk’anoba 155 k’ilogramişakis iqven. Morderi kimolepeşi bundğape ren uça generalurot. Msvape do k’udeli mutepeşişi namtini burmepe xçe iqven. 3’unape do ağanmordale kimolepeşi bundğape bresti steri k’aveşperi ren. Msvape renan kimolepeş ti-mo3’ondobaşi vesile. Omzik’uşi p’eriodis, t’ani o3’iramus ixmarinen. Msvapek oçirdilupan 3’ip’ilepes şemsiye steri. Bundğape muşi çiçku ren. Oçvaluşi dulya ikipan. K’arta juri k’itisti uğun ç’angi. Deveşk’vinçişi t’rik’epe renan dido menceloni. Murenki, am menceloni t’rik’epe var renan estet’ik’uri. Ubundğaloni renan. K’vinçik dodgitun jur k’itişi jin. Am k’itepek onk’ap’uşa nuşvels yado isimadinen. Mçxu uça 3’am3’amepe uğun. Na içkinen k’onari, dixaluri 3xovarepes na aqven tolepeşen umosi didi tolepe uğun.

Skidala muşişi iptineri 30 3’anaş morgvalis skups. Ar 3’anaş morgvalis nanç’inerot 100 markvali skups. Deveşk’vinçepeşi monç’vaşi sist’ema ren oint’eresoni. Cogi oqopinot skidunan. Nak’otxani deveşk’vinçik naşkumers markvalepe oşkendari ar obğes. Am obğes var uğun çkar k’valifik’a3ia. Xvala k’ut’ali na var ren ar ğorma. Am ğormas, mtini nenaten, obğes k’arta 1,5 k’ilo na ren nanç’inerot 40 markvali iqven. Am markvalepe oçvalu ar 3’una deveşk’vinçişi dulya ren. Monç’vas na gyexen 3’una deveşk’vinçis nuşvels ar kimoli deveşk’vinçikti. Murenki 3’unas gyaxunen 20 k’onari markvalişi jin. Am sebebiten majura markvalepe get’k’oçups obğeşen. Mara am get’k’oçu var ren ugagnaponi. Deveşk’vinçik ti-muşişi markvalepe amiğaps, monç’va şeni na gexedasunon markvalepeşi doloxeşa. Majura 3’unapeşi markvalepe gamiğaps obğeşen. 3’una deveşk’vinçis majura markvalepeşi doloxe, ti-muşişi markvalepe perpobaten na az’iren, oxui3’oneri ren. Markvalepeşi xeç’ep’as uğun ç’iç’it’a havaluri xut’ulape do entepek nuşvelnan 3’ip’ilepes oşvanu şeni. Nana deveşk’vinçik ti-muşişi markvalepe am ç’iç’it’a xut’ulapeşen içinops yado isimadinen.

Deveşk’vinçepek seksualuri mordinobaşa jur 3’anaşen otxo 3’anaşakis nunç’işunan. Mara artneri 3’anapes, kimolepe 1,8- 2,7 met’ro, 3’unapesti 1,7 -2 met’roni mağalobas oqopinu dvaç’irs. 3’ip’ilepe k’arta tutas 25 sant’imet’ro konari irden. Ar 3’ana şk’ule, deveşk’vinçepes aqvernan 45 k’ilogrami monk’anoba. Deveşk’vinçepek skidunan nanç’inerot 75 3’anaş morgvalis, entepeşi Ğormoturi at’mosferis. 1.500 met’roni mendranoba mskvanobaten az’irenan. Deveşk’vinçişi bundğa adalet’işi simboli işinet’eren mcveşi Egvipt’is.



                                                                                                                                                              TÜRKÇE