DUDBUT'K'A

TANDİLAVAŞİ İLHAMURİ ODUDE: MUZATA SAUPLOŞİ

Yaşa Tandilavaşi Kortuli leksepeş k’orobape, “Muzata Sauploşi” coxoten 2004 3’anas Tbilisis gamiçkvinu. K’olxuri K’ult’uraşi İnt’erna3ionaluri 3ent’rişk’elen na gamiğinu svaras 111 but’k’a uğun. Tandilavaşi, nanaşnena muşiten ç’areli na ren Lazuri leksepe arxvala 12 but’k’a k’onari ren.

Svaras, “Lazuri Dialekt’is Leksepe” dudari k’ala; Şurimşine Nana, Laziş Birapa, Piraliş Birapa, Biç’iş Birapa, Ar Ambari, Sarpi Çkinis, Xelak’aoba, Ma Mi Vore?, Nanaş Nena, Anbani, T’rap’izoniş İmp’eria steri leksepe gez’in. Lazuri, leksi oç’aru şeni idealuri ar nena na ren, irişen k’ai na oxo3’onapaps Tandilavaşi leksepe, didopeten beste xveneri ren. Leksiş svaraşi 3’oxleni gverdis; “K’arta oras İber-Kolxiş artobaşi loqa nani mosiminapi” yado tkvala ç’ars. K’ap’ulaşi gverdisti maleksek muşi xeşç’araten antepe ç’areen: “Xe çkimis k’alemi çkimi dobadonaşi gurişmeç’voni ist’oriak emozdapu. Mara am xali oraşi umusait’obaşi sebebiten leksot var itkvineret’u do xoloti dido t’erit’orialoni Okorturaş Lazona mu sebebiten ren na var molişineret’u.”

Yaşa Tandilava, 24 K’undura 1950 tariğis oput’e Sarpis dibadu. 1951- 1953 3’anapes ocaği muşi k’ala, artot K’azakist’anişi ç’it’anoğa Ek’onabadişa txozinaşa mendiçkvinu. Sarpis geç’k’apuroni do Gonias oşkenda n3’opula, Tbilisisti Oxen3aluri Universit’et’işi Filologiaşi Fak’ult’et’i notamamu. Eçi 3’anaşen met’i 3’anapeş morgvalis oput’e Goniaşi p’edagogot ok’uleti artneri n3’opulas direkt’orot ixandu. Andğaneri ndğas, Okorturaşi Galendulyaş Nazirobaş Batumişi 3’oxloxtimobas majurani mdivanişi st’at’usiten ixandeps. Natia Lazişvili k’ala çileri na ren Tandilavas, sum bere do jur mota uqonun.



                                                                                                                                                              TÜRKÇE