DUDBUT'K'A

SİMADAŞ OK'OXVOBA: PSİKOZİ

Psikozi, simada do şignapa dido na ok’oixven ç’k’ualuri xali oxo3’onapu şeni ma ixmarinen generaluri ar psikiaturi t’ermini ren. Psikoturi epizodi na ağoden zabunepek halusina3iape z’iropan, deluzionuri ocerupe aqvenan, şaxisobaşi oktirobape do simadaşi ok’oxvobape o3’irapan. Psikoturi epizodi şeni mtinoba k’ala k’ont’akt’iş meç’k’vidu varna zarari oz’iramuten k’arakt’erize ren ya itkven. Ağanmordalepes umosi dido na iz’iren psikozi p’at’i ar ç’k’ualuri zabunobaşi nişani iqopinen.

Generaluri psikiatris psikozi nosişi monk’a zabunobaşi sempt’omot k’abuli ixvenen mara psikozi ar diyagnozi var işinen. Oşkenda muşis arxvala namtini ar psikologiuri varna fizik’uri xali k’ala k’ont’akt’i var uğun nati xususurot şizofrenia, bipoluri ok’oxvoba do k’liniuri monk’a depresia k’ala mek’iroba ixvenen. Edo xolo psikoturi xali na yoçkindaps, na iz’irinen fizik’uri p’at’ologiapeti koren; kuniş o3an3alu varna majura norologiuri ok’oxvobape, lupusi do oxvamç’k’obaşen yeçkindineri nark’ot’iuri maddepe oxmarinuşen xe ozdinu steri.

Psikoziş t’erminis, k’oçişi ak’sionepeşi sebebiten na var ikabaxat’inen do huk’uk’uri ar t’ermini na ren delobaşen ok’ortinu dvaç’irs. Xolo eşo ar şaxisobaşi ok’oxvoba na ren psikopatişenti çkvaneri ren. Juri xolo artneri ren yado isimadinen do psikozot imk’ulanen nati psikozis, psikopatişi temeluri xususobape k’ala mengapoba var uğun; xususurot psikozis şiddet’i dido ç’it’a iz’iren do mtinobaşi şignapaş ok’oxvu do gondinuti piskopatis dido ç’it’a niginen.

Psikozis xolo deliryumişi xalişenti ok’ortinu dvaç’irs, muşenido ar psikoturi k’oçik mağaloni int’elakt’ualuri amagi na uk’ors dulyape gonç’k’ireli rt’aşi axvenen. Çodinurot, ç’k’ualuri zabunobapeşenti ok’ortinu dvaç’irs. Psikozi majura ç’k’ualuri zabunobapeşi ar sempt’omot iz’iren. Mara oçkinaponi ar t’erminot muşebura ar zabunoba işinen. Mesela, şizofrenia na omç’un k’oçepek psikozi na var iz’iren ginz’e orape golvaçkvinenan do bipoluri ok’oxvoba do depresia na omç’un k’oçepesti upsikozuri şignapeşi sempt’omepe ağodenan. Tersot, k’roniuri ç’k’ualuri zabunoba na var omç’un ar k’oçis, kesifi st’resi varna ar adversuri ç’amişi reaksiaş sebebiten psikozi yaçkinden.

Psikozişi ar-jur albaturi sebebi ren. Psikozi tudenşuuroni ar ç’k’ualuri zabunobaşi mesela bipoluri ok’oxvoba varna şizofreniaşi sebebiten yeçkindun. Psikozi xolo ç’k’ualuri monk’a st’resi do amfet’amini, LSD, PCP, k’ok’aini varna sk’opolamini steri maddepe mağaluri dozepes varna k’roniuri oxmarinus yeçkindun varna manz’inen. 3ent’ruli xuçeşi sist’emaş depresanuri ç’amepe dido manişa naşkvinu psikoturi epizodepes nuxit’onups. Psikozi mçirot dido çkvaneri zabunoba varna xalis na iz’iren şeni (mesela AİDS, lepra do çaçxura) psikoturi ar epizodis ar sebebi var uğun.

Psikozişi nişanepe aşo isvaren:

Simadaş ok’oxvoba - simadapes çkineri ar sist’ema uoqopinoba, oxokteri ar xali oğodobaşi sebebiten oğarğalus ok’oxvobape, k’un3xiş p’roblemape steri.
Şignapapes oktiroba - namtini sebebepe va rt’aşi k’oçişi şignapaş xalepes oktiroba iqopinen do iz’irinen. Mesela çkar sebebi va rt’aşi k’oçik dido guris niç’vaps varnati çkar sebebi va rt’aşi dido xeleberi iqven.
Deluzionuri ocerupe - k’oçis umtini simada do ocerupeşi manceş oqopinu. Am ocerupe dido k’ap’et’i do israroni iqopinen.
Halusina3iape - k’oçepes mtinobas na var ren mutxanepe oz’iru, oşuru varna ognu steri şignaş ok’oxvobape iz’irinen.
Şaxisobaşi oktirupe - k’oçişi şaxisobas do ak’sionepes didi oktirobapeş oqopinu.

Didi oktirobaşi sebebiten şvelaş 3’oxle psikoturi k’oçi k’ala seriuli iğarğilinen. Am ğarğalapes gomorgvaluri do so3ialuri fak’t’orepe şeniti çkina ik’oroben muşenido antepek psikoziş etiologias becitoba na uğunan içkinen. Oşvela generalurot ç’amiş şvela k’ala psikologiuri terapiten ixvenen. Ç’amiş şvelas ant’ipsikoturepe işvapen. Psikologiuri terapi psikozi na manz’inen speropeşa, k’ap’uloni p’lanişa do k’oçişen k’oçişa dido iktiren. Direkt’uri terapi k’ala grup’uri terapiti ip’rat’ik’inen.