DUDBUT'K'A

ROMANİAŞİ DODGİMOBAŞ K'ANONİ İKTİRU

Romaniaşi hukumetik, dobadona mutepeşis oxomç’k’inuşi menda3’k’omilurot çkvaneri xalk’epeşi dodgimuşi k’anonepe muşi doktiru. Romaniaşi P’arlament’os k’abuli na ixvenu do 26 Mirk’anişi dğas ofi3ialuri gazetas noç’areri oskedinuşi skidaloqopinot xvenapus na gyoç’k’u am k’anonik; Romanias t’urist’ik’uri goxtimupe domeç’irobanurot, am dğalepes Romanias na skidun do ek’onomiuri stenape na uğun çkvaneri xalk’epeş dodgituşi k’rit’erepes becitoni dido mutxanepe kodoktiru.

Am ağani k’anonik, ginz’e p’eriodişi vizape, şirketepeş dudmaxvenci vana maoktaleşi st’at’u na uqonunan çkvaneri xalk’işi dobadonamşinepes arxvala Romeniş Çkvanerxalk’işi Goşogorepeş Ajansik (ARİS) k’abuli qvasunon. Romeniş Çkvanerxalk’işi Goşogorepeş Ajansik na gorasunon irişen beciti k’rit’erepe; firmak na ren dixa, na noğiraps ticaret’uri oğodoba muşi, k’ap’it’ali şeni na dvaç’irs dvaç’irobape, ticaret’uri oxandupepeşi p’eriodis firma şeni ar ticaret’uri p’laniş oxvenu şeni k’abulişi oxvenobaş oqopinot kogui3’opxinu. Edo xolo, çkvanerxalk’işi ar firmas na dvaç’irs ek’onomiuri fonepeşi mancoqopinoba na uğunşi k’rit’erepe oşkendaşa mtinurot gamağumu do am sakvari şeniti Romaniaşi doloxe ar bank’as k’oçepe şeni irişen ç’it’a 100 şilya Euro do limit’ediş firmakti irişen ç’it’a 70 şilya Euro na gedumaluş dek’ont’iş isp’at’işi oxvenu ak’vandups am ajansik.

Romaniaşi doloxe ticaret’uri stenapeşi ak’t’ivit’epes amaxtimurot ARİSis oxvenu şeni dvaç’irs yado k’abuli na qu dvaç’irobape na va axvenu k’oçepes ginz’e oraş p’eriodişi viza va niçinasunon. Am oğodobaşi doloxe na ren sakvarişk’oçepes p’ersonelişi vizaş yezdimuşi şarati dido mç’ipaşaşi kogeink’ilen. Umeç’k’vidoni dodgimepes eşo ek’o dido mutu va iktiru. Am k’anonik, Romenişi cinci na uğun çkvaneri xalk’işi k’oçepes, Romanias na dibadu çkvaneri xalk’işi k’oçepes, dobadonas dodgimu mutepeşi Romanias faida na aqvasunon çkvaneri xalk’işi k’oçepes do nana-baba mutepeşi umeç’k’vidoni dodgimuşi hak’k’i na uğun 18 3’anaşi unonç’e berepes umeç’k’vidoni dodgimuşi hak’k’i go3’udumers.

İrişen ç’it’a 1 milyoni Euroş ğirsoburot vana 100 masakvares umek’vateri sakvari na meçaps do am oğodopaşi ispat’i axvenen çkvaneri xalk’epeşi dobadonamşinepes, xut 3’anaşen dido oras Romaniaşi doloxe dodgimobaşi udvaç’irobaşi oğodobate umeç’k’vidoni dodgimuşi komeiçinasunon. K’anonik zop’onski, a3’iş k’ule mk’ule oraşi t’urist’ik’uri goxtimupe şeni Romaniaşa moxtimu na unon çkvaneri xalk’işi dobadonamşinepek na dodgitasunonan k’arta dğa şeni ibrazi na doqves geç’arelişi ispat’iş oxvenuşi ren. Romenişi k’onsolat’is viza eç’opinu na ak’vandu k’oçepes var ya tkvan na am oğodoba şeni on3’uranuşi do uk’uniktobaşi hak’k’i va ren.

Romeniş dobadonamşinepeşi k’eraş k’oçepeşen na ren çkvaneri xalk’epeş ginz’e p’eriodişi dodgimuşi vizak, Romaniaşi dip’lomat’ik’uri k’amarape do k’onsolat’işi k’amarepeşen, k’onsolat’işi bajepeş umeçamurot komeiçinen. Umeç’k’vidoni dodgimuş hak’k’i na uğun çkvaneri xalk’işi dobadonamşinapek, Romaniaşi sinorepeş doloxe, muç’o eşo Romenişi dobadonamşinepe steri, na skidunan dixa do noğa, çkvaneri xalk’epeş p’olisişi maoktalepes ambari umeçamurot na unonan steri aktirenan.



                                                                                                                                                              TÜRKÇE