|
İRİ NENAŞİ BİRAPA: LİLİ MARLEEN
“Lili Marleen” coxo muşiten na miçkinan birapaşi originali coxo ren “Feneriş tudeni k’ulani”. Birapaşi t’ekst’i ç’areret’u Hans Leipik. Hans Leipi rt’u Germanuri malime, 1915-s ok’vak’idu şeni na ideret’u Rusişi front’is. Manavişi k’ulani Lili do front’is ar ikindişi mpulas na gondunu Marleen coxoni hemşire şeni ç’areret’u leksi muşi. Ok’ule leksi, “Nobet’is Ağanmordale Malimepeşi Birapa” coxoten gamiçkvinu. Best’e muşiti Norbert Schultzek 1938-s qu. 1939-s, Lale Andersenişk’elen Marlene Dietrichişi xonariten kvaş p’lak’is doliç’arinu, birapaşi çinoberoba na rt’uşen met’i monz’inapu.
Lale Andersenis unt’u omt’inu Svet’zerlandis na skidut’u megabre muşiş k’ele, limaşi oras. Am megabre muşik k’rit’ik’upt’u Nazilepe. Emuşeniti uça list’es geç’areli rt’u coxo muşi. Lale Andersenik na ç’areret’u kart’ali Gestapoşk’elen iz’irinuşi iç’opinu. Lale Andersenik dido dozoni nciraşi ç’ami na gyaşku, ok’uleti k’on3ent’ra3iaşi k’ampis na ğuruşi ambari BBC-şa nunç’işu. Ambari ignapinu. Nazuri P’rop’agandaşi Naziri Joseph Gobbelsik BBC-s m3udela o3’iru şeni, Anderseniş oskiduşa gza meçu. Birapaşi p’op’ularobak muşi skidalas nuşveleret’u. 1941-s Hitleruli armiaşi xe gedumuten, k’arta limcis saat’i 21:55-s Belgradişi Radioşen na iç’andinu birapa hem Germanuri hemti majurapeşi malimepeşk’elen isiminu nç’elaten.
Birapaşi tkvalape iktirinu Amerik’anuri do Brit’aniuri malimepeşk’elen İt’alias. “D-Day Dodgers”işi birapa ixvenu. Rusepekti birapaşi tkvalape oktireret’es. Birapaşi İnglisuri versiati Jill Danielsişk’elenti ibirinu Englandis. Majurani Kianuri Limaş oras, artikarti k’ala na ok’vak’idaps jur k’eleni malimepeşi legandaruli birapa iqu. Jur front’isti, jur k’eleşi oxzabunepesti Lili Marleeni iç’andinet’u. Vusiminatşi, andğasti gemzuleri na viqvert am sixironi birapa, Turkuli versia oqopinot Ahmet Kayaşk’elenti ibirineret’u.
|
TÜRKÇE
