|
LİMAŞEN MEÇ'İRELİ MARGALEPE!
Abxazi-Kortuşi lima, 14 Mariaşina 1992 tariğis Kortuli Na3ionalur Maçvaleşi Armiaş sardali Tengiz Kitovanişk’elen Soxumişa xe gedumu do am oğodaşa Abxazi askerepeşi coğabi meçamuten yeçkinderet’u. Ar 3’anaşen umosi ginz’e oras na naqonu lima, 30 St’aroşina 1993 tariğis genomskide Kortu askerepe k’ala Margalepeşk’elen (Krist’iani Lazi), Abxazia naşkvinuten içoderet’u. Am limas jur k’eleşen nanç’inerot 8.000 k’oçi ğureret’u do 200.000 k’onari Abxazialuri Margali dobadona mutepeşişen itxozineret’u.
1993 3’anaşi St’aroşina tutaşen doni k’elenepeş oşkendas na dibargu 1.500 k’onari Rusi mo3’qvaşi askerik limaşdodginu ok’ont’rolu şeni ixandeps. 1997 3’anas Şevardnaz’e do Arz’inbak askeri uoxmaruşi temas ak’t’i xveneri renan. Edo xolo, t’erit’orias limaşdodginu na ik’ont’rols Ok’ont’aleri Na3iapeşi oxosaruş menceli dobargineri ren. Mo3’qvaş oçvaluşi ak’t’ivit’epe didopeten, limaş 3’oxle nak’onoba muşişi % 90 k’onari Margali na rt’u t’erit’oria Galis iqven. Uk’uniktinuşi imendi xoloti na var uğunan şeni na işumernan Margali multecepek xususurot Galis, p’aramilit’eri grup’epe 3’opxineri renan. K’ont’roluri t’erit’oriaşi xali dido oşkurinoni ren. Okortura do Abxaziaşi oşkendas mo3’qvaşi ok’oxtalape 1997 şen doni Ok’ont’aleri Na3iapeşi mancoba do Englandi, Rusia, AOO, Fransia do Germaniaşi ent’entobas ixor3elinen.
Abxazia şeni na molişinen jur alt’ernat’iuruli oçodinuşi ok’vanduşen maartani federa3ia iqopinet’u. Mara Abxaziaşk’elen, aya mutepeşi iptineri ok’vandu na rt’u do Okorturaşk’elen k’abuli na var ixvenu şeni a3’işk’ule dido yano iqu ya otkuten, ti-moşletinobaşi k’ararişen do limaşen var uk’uniktinasunon yado oxoi3’onapinen. Majurani alt’ernat’ivişi toliten, Galişi 3’alentunaşk’eleni dixa Okorturaşa meçamu, Abxazia “oxen3aleş tudeni organiza3ia” st’at’us avt’onomiuri t’erit’oria oqopinu, sinorepe AGİT işi askerepeşk’elen oçvalu isimadinen. Artneri modeli 3’alentuna Osetia şeniti op’rat’ik’inuten AGİT işi xeten, t’erit’oria int’erna3ionaluri solidarobaşa oxaziru ip’laninen.
|
TÜRKÇE
