|
BİROL TOPALOĞLUŞİ "EZMOCE" İXOR3ELİNU!
Kalan Muzikişk’elen “Ezmoce”ş gamaçkvinuten, Birol Topaloğluşi izmoce ixor3elinu. 3’oxleneri 3’anapes Kalan Muzikişk’elen “Heyamo” (1997), “Aravani” (2000) coxoni k’orobape do “Lazeburi” (2001) coxoni arkivuri albumepe gamiçkvineret’u. Ginz’e oraş k’ule na gamaxtu k’oroboni masumani am albumis, t’radi3ialuri do modernuri inst’rument’epe arto oxmaruten na ixvenu on3’uranupe otantik’urot itakdiminen. Albumis Lazuri, Margaluri do Turkuli 16 xalk’uri birapa do beste gez’in.
Albumis Lazurot; Lazi mamusik’e Helimişi Xasanis mosape muşi na şupan maçxomepe şeni ç’areli na uğun Maçxomeşi Birapa coxoni mağali temp’oni birapa, baba muşik rizaten na var meçeren Sari coxoni k’ulani na omt’ineren Fatişi hekaye na ren Fati Do Sari, Lazuri nenas zoğap’icis na nirçen dişkapes na itkven karkalakepe na k’orobups do oç’u şeni oxori muşişa na nimers Lazi k’ulanişi birapa na ren Karkalaki, golapeşa mcveşi orapes steri k’uçxeten oxtimu na guinç’els ar k’oçişi hekaye na ren Gola Gza, ç’it’a ar kapçiaşi hekaye na ren Kapçaşi Meseli, moxtasneris na amgars Gunz’e K’aide, guda k’ala na ixoroninen mara goç’k’ondineri sum Rizinişi Xoroni do Allak Ekç’opu coxoni otantik’uri ar destani gez’in. Albumis Margalurot; Belkania do Topaloğluk, Nana Belkaniaşi p’op’ularuli birapa na ren Didou Nana dueti oxvenuten, anonimuri qoropaşi birapa na ren Margaluri Oropati vok’ali oxvenuten ibirnan.
Vitoxut 3’anaşen doni musik’aş p’iasas na ren Birol Topaloğluşi çodinuri albumi “Ezmoce”, gurimeç’voni ar xali ren mara na mepşvent’it steri var gamaxtu. Mabiraleşi am xanda, 3’oxleni xandape k’onari mskva var iqveren. Turkias Lazuri musik’a itkvaşi epto na guişinen Birol Topaloğlukti Lazuri naşkvuşi do Turkulişa goktinuşi, aşopeten p’op’ularizma oxvenuşa xaziri na renşi sinyalepe meçaps. Maartani albumi muşi “Heyamo”şi 12 birapaşen 1 dane Margaluri do 11 dane Lazuri birapa rt’u do çkar Turkuli birapa var gez’it’u, “Aravani”şi 16 birapaşen 13 dane Lazuri do 3 dane Turkuli rt’u. “Ezmoce”s na ren 16 birapape, ar teri majurani fara gedvalerot 2 dane Margaluri 8 dane Lazuri do 6 dane Turkuli birapaşen 3’opxineri ren. Helimişi Xasaniş mirasiten na içinu do am miraşi na var amordinu do na var açvu Birol Topaloğluk albumi “Ezmoce” k’ala, Lazurişi xonariş oqopinuşi misiaşen omendranus na gyoç’k’u o3’iraps.
Kianas guda do kemance gelaçamuşi ust’at’obaten na içinen, kianas etnik’uri Lazuri musik’a otemsiluten na işerefinu, na meçu int’erviu do emu k’ala na qves rop’ort’ajepes otantik’uri Lazuri musik’a oxvenuten na im3kvet’u, ticaret’i vardo musik’a vikip yado idia na ikipt’u, nananenaten gamantanuşi ak’vandinu xveneriti na ren mabiraleşen, mak’orobaloba k’ala maomralobati oxvenu, Lazuri do Margaluri birapapeşa mxuci meçamu vimendupt.
|
TÜRKÇE
