DUDBUT'K'A

ZUĞAUÇA MEZBELE VA REN!

Zuğauçak, lok’aluri maktalepeş uonç’eloba do oxvenu na dvaç’irnan dulyapeş oyanuşi sebebite muç’o eşo pinti genomskidepeşi ok’oxtales niktu. Zuğaşi zuğaşp’icepes na dibğen oxoreburi do oxz’abuneburi pinti genomskidepek, ğalepes na diben k’analizasyonepek do indust’riaşi pinti genomskidepeşi sebebite Zuğauçak k’arta dğas umosi ipinten. U3’k’aroni pinti genomskidepeş ok’obğuşi dixape na va ren şeni pinti genomskidepek zuğas va na germaşi dixapes kait’k’oçinen.

Zuğauças manz’ageri na renan; Bulgaria, Romania, Turkia do Uk’raina steri 17 dobadonak oxoreburi do oxz’abuneburi pinti genomskidepe muşi zuğas naşkumenan. Zonguldaği do Giresuni steri noğapes pinti genomskidepek zuğaşi zuğaşp’icepes, Ordus Medeliş ğalişi gomorgvas, T’amt’ras Değirmenderes, Akçaabat’is Soğutlişi ğalis, Sinop’isti germaşi dixapes kanişkvinen. Zuğas na kanişkvinen pinti genomskidepek m3ika çkvaş k’ule talğapete zuğaşp’icis nunç’işunan do aşopete zuğaşp’icepek uoxmarinoni, uonçvironi iqvenan. Zuğaşp’icepes uçkineri na kanişkvinen am pinti genomskidepeşi sebebite 10 k’ilomet’ro ginz’enoba na uğun Samsonişi Costal coxoni zuğap’ici muşik, oxoreburi do oxz’abuneburi pinti genomskidepeşi ok’obğales kaniktu. Çinarlik’iş Beledieşk’elen na ixvenen opağuşi oxandupepek kort’as nati zuğaşen k’arta dğas pinti genomskidepek gamulunan. Ç’amişi p’ot’lik’ape, serumepe, ç’amepe, p’lastik’iş oxz’abuneburi mat’erialepe steri dido çkvaneri pinti genomskidepek zuğaşp’icis dido p’at’işi kogyamkveren. Pinti genomskidepe şeni Noğaş Gomorgva do Germaş Madudmaxvencobas na kaiç’arinu ofi3ialuri noç’arepeşen mutu skani va gamulun.

Çinarlik’iş Beledieş Dudmaxvenci Nihat Soğukik, zuğaşp’ici çkini k’arta oras pağupt mara am p’roblemaşen va meviçitit do oxoreburi pinti genomskidepekti zuğaşen mulunan ya tku. Soğukik, majura zuğaşp’iciş belediepe k’ala ok’oxtimute do arto axandute am p’roblema domaçodenan ya tku. Samsoniş Noğaşi Gomorgva do Germaşi Dudmaxvenci Kadir Kilinçikti zuğaşp’icişi opintu şeni ar goşogoras gevoç’k’atminonan ya tku. Noğaşi Sağobaş Dudmaxvenci Mehmet Kilinçikti, pinti genomskidepek solendo mulunan şeni dido mç’ipaşaşi do mçireşi ar goşogora dop’atminonan ya tku. Kilinçik, oxz’abuneburi pinti genomskidepe mik zuğaşp’icis maxsus naşkumers do çkinti am p’at’işi oğodoba kobz’irit na, na qves k’oçepes ofi3ialuri ceza meçamu şeni oxandupepes gevoç’k’atminonan ya tku xolo.

Sinop’iş Gomorgvaşi Megabrepeş Pondişi Dudmaxvenci Hale Ozenikti, Zuğauças zuğa do gomorgvaş pintinobak çodinaşi 15 3’anas dido kodirdu, ya tku. Ozenik xolo, “Dido 3’anapeşen doni zuğauçaş na naşkvinen pinti genomskidepek, indust’riaşi pinti genomskidepek, oxz’abuneburi pinti genomskidepek do k’analizasyonepek, andğaneri dğalepes muç’o eşo dido p’at’işi bela memaktes. K’oçepes gurmoxtimerişi oqopinot varti zuğaşen faida aqvenan, vartiti şurgedginerepes. Am opintuşi genosit’i ordoşen oçodinuşi voret do eşoti domaç’irenan. Varna varti zuğa çkini domiskidasunonan vartiti zuğaşp’ici çkini.” ya tku.



                                                                                                                                                              TÜRKÇE