DUDBUT'K'A

"OXOŞKVİNERİ DO MO3'QVİNERİ DOBADONAS OSKEDİNU MİNONAN"

Ağani ar limaşi şkurna na dologzun 3’alentuna Osetiaşi ağanmordaluri organiza3iapek mo3’qvaş doloxe oskedinuşi unonoba mutepeşi, kianaşa eşo becğineri gamiqures. Kianaşi k’un3xişa na gamiçkvinu mesaji mutepeşis, ç’it’a 3’aneri rt’esşi limape, ğurape do şkencepe bz’irit na tkves ağanmordalepek, ‘oxoşkvineri do mo3’qvineri dobadonas oskedinu’şi ak’vandu mutepeşi aşo oxo3’onapes:

“17 3’anaş 3’oxle 23 3’ilva 1989 tariğis Okorturaşi xe3alak 3’alentuna Osetiaşi xalk’işa uognapinoni ar lima geç’k’apinu. Oseti xalk’ik andğati p’olit’ik’uri, ek’onomiuri, ambaruli blok’adaten gok’ireli ren. Didopeten beroba çkini k’urşumiş xonari do ot’k’va3inupeten golaxtu. Nana do babape çkini ok’vak’idinupes ğuru, entepe gzapes oğirines, şuri şvaneri let’as doxves, şkence oğodes. Gurişmeç’voni ren mara çkin limaten pskidut. 3’alentuna Osetias andğaneri ndğas int’erna3ionaluri huk'uk'uri normepe var ixor3elinen. Kianaşi iri organiza3iapek becitoba na var momçapan iz’iren. Ok’ont’aleri Na3iape, Avrop’aş K’onseişi P’arlament’erepeş Meclisi, Avrop’aşi Emniet’oba do Oşkendarobaşi Teşkilat’i, Avrop’aşi P’arlament’i, çkvaneri oxen3alepeşi elçobape oqopinot dido int’erna3ionaluri organiza3iapeşa na p’ç’arit kart’alepes çkar coğabi var niçinu.

Çkin faşizma do t’erorizmaşen dido zarari z’ireri ar xalk’i voret. Osetepe kianaşen mek’arbu şeni ixandes, 1920 3’anas k’oçepe oğurinuşa do biç’i berepe yeç’k’vidinuşa geiç’k’inuşi oşi şilyapeten Osetis oxori mutepeşi naşkvinu do imt’unuşi gza o3’ires. Moxtasneri çkini 90 oni 3’anapes mejiles, 'Beslan' işi t’ragedia şeni a3’iti vimgart. Andğa xolo noğinz’ibus naqonopan, berepe çkini raxat’i var ancirenan, sokağis raxat’i var gvalenan, muşenido gamamç’ipaneri mastolepeş t’ufengepeşi landes oskedinus mevaqonopt.

Vitoni 3’anapes na naqonu na3ionaluri mebaz’gape, silaxoni oyolupe, et’nik’uri genosisepek ç’it’a doskidineri xalk’i çkinişi k’abaxat’onepe gurami oqopinot na ignapinen, Kortuli faşizmaş simadaşi mancepe P’rezident’obaşi k’arariten uğureli na işinen ar oxen3ales na var iskedinen oxomo3’onapapan. Çodinas xonari çkini ignapinasen, kianaşi xalk’epek ç’it’a mara dido derdepe n3’ireri xalk’i çkinişi k’aderişa quci meçasen yado imendi miğunan. Çkin xolo muşeni viğurinet oguru minonan? Oskedinu na minonan şeni-i? Oseti na voret şeni-i? Çkini nena do k’ult’ura oçvu na minonan şeni-i? Çkini gza na p3xunit şeni-i? Oxoşkvineri do mo3’qvineri dobadonas oskedinu na minonan şeni-i?”



                                                                                                                                                              TÜRKÇE