|
BURSASPORİŞİ OXO3'ONAPA
Sp’ort’is, fut’bolis dido k’oçepek na icernan maokaçobaş oqopinuşi k’rit’eri; gecginoba do xolo emute na iqven şamp’ionoba do k’arta oras na iqven gecginobapek 3’opxups. İri xolo ondik geç’arelite na iğirsen, gecginobaşi k’rit’erik arxvala şamp’ionoba k’ala na molişinen namtini majuranişi vana masumanişi k’lasoni dobadonapes, majura mordineri dobadonape steri var do sp’ort’is skidalaşi ar oskedinu, so3iologuri oqopinoba, noğaşi rek’lama, na skidun vana oqopinoba na uğun muşi noğaş t’akimiş maokoçobaşi xalis dido p’at’işi ik’viren do didopete na va iz’iren ar mutxani ren. Muşeniki, k’oçepeşi ç’k’uapes, kunepes p’at’işi na intxen ar gagna ren aşo dobadonapes; mik şamp’ioni iqveret’una, iquna, xolo iqvenna, mik menceloni renna, namuk umosi do ucgişi p’op’ulari renna emuşi maokoçale iqvaginon, sist’emak aşo ek’onomiurişi oqopinot mencelmaokoçaleş t’akimepeşi jin kageidginen, naqonoba do menceli muşi aşo t’akimepeşen yezdips, sist’emaş tolis do menda3’k’edala muşis Bursaspori steri t’akimepeşi do maokoçalepeşi çkar mutu skanişi ğirsi va aqven. Sist’emak aşo t’akimepeşi gecginobape va unon, ugecginobaşi oqopinoba mutepeşi şeni xe muşişen mu na muxtepsna dido mç’ipaşaşi oşkendas gedumers, sebebi muşiti gedgineri do 3’opxineri sist’ema mutepeşis k’et’i doloşorç’ak’ups aşo t’akimepek.
Bursaspori, nami muşite “Timsaxepe”, Turkiaşi ligas marjinalit’eşi simboli, majuraniş xeşi var do arxvala muşi dudi na 3’opxups t’akimi muşi gurişmoxtimerite na qorops maokoçalepeşi ok’obğale na uqonun t’akimi, jvari do xçeşi perepete na t’k’oçeş golepeş k’ule timsaxişi goxtimupe na ikips, coxo mutepeşi t’ribunepeşi k’abğapete na molişinen, mara ar imp’erias nananoğanoba na qveren, 1810, 1850 do 1877 is Jilentuna K’avk’asiaş xalk’epeşi, 1877 Osmanuri do Rusişi limaş k’ule Lazepek, Gurcepek do Ahisk’aş Turkepek dudi mutepeşis nobargene na du3’opxes, 1900 3’anapes Balk’anişi limapeş k’ule Balk’anepeşen na moxteret’u xalk’epe doloxe muşis na ak’ateret’u, k’ult’ura do çkinoba muşi nami muşi na iqveren ar indust’riaş diviş noğaşi didi t’akimi.
1877 Osmanuri- Rusiş limaşi oras Xopaşen moxtimeri, oşi 3’anaşen dido oraşen doni Bursas na skidunan k’eraşi Xopa na uz’iramun mitiskani na va duskides ar k’eraşi “Badepeşi: Badişi” motapeşen, Lazuri k’ult’uraşen mendra na elaskideren, Bursas na dibaderen do ekonaşis irderen Lazi na ren Mjvari P’oyrazik (Ercan Şen) Bursaspori şeni aşo oxo3’onapape dotku: “Bursak, jur milyonişen dido maxaroba muşite Turkiaşi maoxtani didinobaş indust’riate fut’boliş sup’eriş ligas iptişi maotxanis osteramu na dvaç’irs Turkiaşi dido cinconi t’akimepeşen ar teri ren. Bursasporis, 2.000 dido k’ap’et’i fanat’ik’uri oqopinot, 30.000 iş umosi dido akt’iuri standart’i do xolo ek’onari p’asiuri maokoçale uqonun. Am t’araftarişi ok’obğale; majurani Anatoliaş noğapeş majuranişi xeşi oqopinot namtini didi otxo t’akimepeş ar terişiti guriş moxtimeri qoropa na va uğun vana eşo t’akimepeşi semp’at’obati na va uğun arxvala Bursaspori çkinişi qoropa doluğzun do Bursasporişi maokoçale na ren do emus mxuci na meçaps k’oçepek 3’opxups. Manti an maokoçalepeşen ar teri na vore şeni dudi çkimi şeni dido xeleberi vore. Muşenido, am ok’oçalepeşi ok’obğalek çkar mutuskani şamp’ionobaşi uok’vandinurot k’aişi dğas, p’at’işi dğas, k’arta oras t’akimi muşişi xolos kort’u do xolo oqopinusti naqonasunon. Medias Bursasporist’i itkvalaşi dido p’at’işi imaji na uğun şeni am p’at’işi imajişi oktiru çkin mteli xolo Bursasporişi maokoçalepes irişen muimi dulya go3’omiz’inan. Geç’k’alaşi metkvalete doptkvatna mteli xolos na miçkinan steri sum 3’anaş 3’oxle dido p’at’işi uşansobate sup’erişi ligaşen kameblit do jur 3’anas A Ligas dovisterit. Amuşeniki 2003-2004 3’anak Bursporişi miladiş 3’anaşi oqopinot dop3’opxat do jur çkvanerişi k’at’egoriate oxo3’onapuşi domaç’irenan. Miladiş 3’oxle, Bursak maçi gamaçaps megabre na 3’opxups t’akimis kaicginen, dudi muşi oşletinaş k’ule mu na qvasunon na va içkinen ar t’akimi ren steri maçi na gamaçes k’oçepe var do mteli xolo Bursasporişi ok’obğales p’at’işi na nitkvalen mutu skanis na va irgun ugoşogurot, ugagnoni metkvalepek 3’opxups. Aşopete Bursasporis leke na onk’anaps uge3adurot metkvalepe çkimi steri mtinişi Bursasporişi maokoçalepes dido p’at’işi a3’onenan. Mara, 3’oxlenuri 3’anapes maçi na gamaçes, ent’rik’a na qves maoktaleş k’adropeşi k’oçepek iri xolo oras Bursasporişi maoktalobaş meşaxtes, entepek mutepeşi mogapa şeni Bursaspori çkini doxarcupt’esşi çkin iri xolo p’at’işi oğodobape kort’asnati t’akimi çkinis mxuci meçamuşen va uk’univiktit, murenki aşo p’at’işi ondepeş sebebite k’arta maçis k’abğa dop’it do eşopete dido p’at’işi ar imaji domaqves edo 2003-2004 iş 3’anaşi sezoni şakis.
Ar dğa iqu arçkva mendap’3’k’editki, namtini maktalepe çkinik na qveret’es gamaçamupek çkini p’at’inoba şeni muç’o eşo k’omp’loşi oqopinot çkini şeni ixmarerenan edo dido p’at’işi uigbalurot sup’erişi ligaşen kamebleret. Edo işte em oras dido k’ai mevagnitki sp’ort’ik arxvala sp’ort’meneburot ixvenaşi mskva iqven. İpti orapes çkinda dido p’at’işi ar izmoce steri momixtes, muç’o eşo doma3’oneski ordoşen uk’univiktert sup’eriş ligaşa mara maent’rik’e oktolabaşi ok’obğales t’akimişi o3’opxinu var do lobişi oxvenute şamp’ioni na iqven ancax maartani p’eriodişi çodinas koxva3’onu do Bursaspori çkini muç’o eşo şant’işi steri konaşkves do na imt’es şeni t’akimi çkinik umancenurot elaskidu. Maoktaloba şeni mitiskani va gamaxtu oşkendaşa. Ek’o didi Bursaşi noğas Bursaspori na oktalasunon mitiskani na va gamaxtu şeni am p’at’işi xali dido p’at’işi doma3’ones. Edo em orapes am muç’o eşo arxvala ar k’oçik am daçxirişi porçaş odolokunus guroba aqu edo mteli xolo Bursasporişi ok’obğale ağanoburot kok’oxtinu: Levent Kizilik. Mteli xolo em mcveşi imaji, em mvcveşi p’at’işi osimadu kok’oxu, doragadu edo aşopete Bursasporişi maokoçalepe çkinaberişi oqopinot dok’ont’rolinu do em p’at’işi imaji doğurinu. Na golaxtu jur 3’anaşi doloxe Bursasporişi maokoçalepek çkar mutuskani k’abğa va gamiqones, k’abğaşi doloxe va amaxtes do va 3’opxes. K’abğa gamaxtasunon yaşi menda3’k’omilurot na isimadinet’u Beşikt’aşişi maçis maokoçale va mendiqones (dido p’at’işi ontxupe na rt’u tina), Bursas na rt’u maçisti Beşikt’aşişi maokoçalepeti st’adiumis va yizdines. Am oğodobak muk’onari eşo k’rit’ik’işi ar mutxani kort’asnati k’abğa var do mo3’qva na unon ar maoktales oxvenu na dvaç’irtu oğodoba t’u, am oğodoba maokoçalepeşi ok’ont’orolu tkvala t’u. An3’ineri orapes mteli xolo k’oçepek dido k'ai uçkinanki t’ribunepeşi t’erorepe do k’abğape na gyoç’k’apaps do holiganizmas na mxuci meçaps maoktalepe renan. Edo işte miladiş k’uleti am p’at’işi maoktaleş p’ort’re mteli xoloşi orape şeni Bursasporişen mevoçitit, kaepkosit bolaki.
Bursaşi noğak; Anatoliaşen, 3’alentuna K’avk’asiaşen, muç’o eşo Balk’anepeşi eşopete mteli xolo ç’it’anoğapeşen do xolo K’irimişenti moxtimeri k’oçepe na uqonun ar oxoktaleşi noğa ren, mara k’arta k’oçişi ar ok’oxtale renki eti Bursasporişi oqopinobak 3’opxups. T’ribunepek t’akimik ocginasnati, icginasnati k’arta oras t’akimi mutepeşis dido mencelonişi oqopinot mxuci meçaps do qorops. Çkini şeni t’akimi çkinişi qoropak şamp’ionobaşen ucgişi 3’oxlenurot ar oğodoba 3’opxups. Şamp’ioni t’akimişi maokoçale irik iqven mara maokoçaloba çkvaneri ar mutxani ren. Maokoçaloba guriş moxtimeri oqoropu tkvala ren, maokoçaloba majuranişi ligas 20.000 k’ombineş biletişi yeç’opinu tkvala ren, maokoçaloba 22.000 k’oçik arto stvinate marşişi obiru tkvala ren. Edo Bursasporişi oqopinoba aşo ar mutxani ren. Bursasporik, 2006-2007 sezonis t’ribuniş geç’arelişi omogus Turkiaş maxutani, maçepes na mulun maokoçalepeşi st’at’ist’ik’isti maotxani iqu. Çkimi şeni am k’rit’erik didi ar t’akimiş oqopinu şeni dobağine ren. Elbet ar dğas, şamp’ioniş oqopinu na unon ar maoktalek gamulun, mara va gamaxtasnati qoropa çkinis mutuskani oç’it’anu va domaqvenan. Mtinişi maokoçales aşo oqopinuşi dvaç’irs. Qoropaşi uokvandinonik umosi mskva iqven.”
|
TÜRKÇE
