|
GALURİ MARGALEPES ABXAZİAŞ P'ASP'ORT'İ NİÇİNEN
Abxaziak, 1992-1993 3’anapeşi limaş oras xalk’i muşi Okorturaşa na imt’eret’u do ok’ule xolo na uk’unikteret’u Galiş t’erit’oria k’ala int’egra3ia omordinu şeni ağani ar dulyas geç’k’aps. Galuri Margalepes Abxaziaşi p’asp’ort’iş meçamus geiç’k’inen. Abxaziaş P’rezident’obaşi Galişi matemsile Ruslan Kişmariak, t’erit’oriaşi xalk’işa irişen mk’ule oras Abxaziaş p’asp’ort’iş meçamuşa na geiç’k’asunonşi ambari ognapu.
Kişmariak, Galuri xalk’ik Abxaziaşi p’asp’ort’i inç’elnan ya tku do, “Aya ren ti-mutepeşi iri hak’k’i na uğun dobadonamşinepe oqopinot k’abuli na ikipanşi nişani. P’asp’ort’işi opaus na unonanpeşa meçamuş k’aide dvaç’irs. Edo xolo ma, t’erit’oriaş xalk’iş didopek, iri hak’k’iş mance na ren Abxaziaş dobadonamşine oqopinuşa xaziri renan yado vicer” ya tku.
P’arlament’eri Vyaçeslav Vardaniakti, Galuri xalk’is p’asp’ort’i na var uğunan şeni namtini hak’k’epeşen dork’ineri na doskidunan do na unonan steri na var askedinenan goşinapu. Vardaniak, minobaşi k’artik arxvala 3xunapeşa ok’atinus var nirgasunon do int’egra3iati omordinasunon ya tku.
P’rezident’obaşi ofi3ialuri sait’is na ren ar çkinaşi toliten, t’erit’orias na skidunan Margalepe artneri oras Okorturaşi dobadonamşine na renan şeni Abxazias namtini p’olit’ik’uri organiza3iapek do xususurotti op’ozi3iak Galis Abxaziaş p’asp’ort’iş meçamuşa na nodgitunan ignapinen.
|
TÜRKÇE
