|
TRANSİLVANİAŞİ OSMANURİ P'ERİODİ
Andğaneri Romania jur Padişaxik Osmanuri oktalas ok’atu. Eflak’i do Boğdani na vu3’umert omjore Romania do Resp’ublik’a Moldovak, Fatih Sultan Mehmet’işk’elen Osmanuri dixapes ok’atu. Romaniaş masumani genomskideti oşi p’ro3ent’i oqopinot Hungarepeşi xes do oktalobas na rt’u Transilvaniak gverdi oxoşkveriş mapobaşi oqopinot, Hungarulis na itkvalen steri Erdelişi coxote K’anuni Sult’an Suleymanişk’elen Osmanuri oktalobas ok’atu.
Am sum çkvaneri eyalet’işi st’at’uk muç’o eşo K’irimiaş Xanobaşi st’at’us mengapt’u. Jindole k’aişa toliş oz’iramu na uğun ar sotxanis do cixas dobağine yeniçerişi matopepek çumet’es, dobadonaşi doloxeti topi do matopeş oqopinobas izni va niçinet’u. Mara am dobadonapek galenişi kianaş dobadonepes elçepe na uqonut’es, hemti Osmanuri steri var do k’arta oras na dgitun elçepe na uqonut’es dido k’ai miçkinan.
K’irimiaş Xanobas xususuri çkvaneri hak’k’epe uğut’u, oktaloba p’ant’a arxvala ar k’erak ikipt’u. Eflak’i do Boğdanişa am t’erit’oraişi k’erapeşen voyvodape i3’opxinet’u. Erdelişi Mapobasti K’anuni Sult’an Suleymanis mxuci na meçapt’u Zapolyaişi k’eraşen ar mapak kogui3’opxinet’u.
Erdeli, int’erna3ionaluri metkvalate Transilvaniaşi jvari zenepe muşi, artikartis ok’oxtimeri mt’k’alepunape muşi do germape muşi, xampa madenepe muşite mteli xolo k’oçepe na askedinet’u ar dixa t’u. Mara murenki; doloxeni feodalepe muşiş k’abğape do Hungari, Germanepeş oxot’k’va3inuk Osmanuri oktaloba doçodinu. Erdelişi xalk’ik sum et’nik’uri xalk’işen i3’opxinet’u: Hungarepe, Germanepe do Romenepe.
Maeçani oş3’anuraşi geç’k’alasti xolo Romenepek akonaşis didopete na rt’es k’oçepe va rt’es. Maxaroba mutepeşi dido odidanute Erdelişi oktaloba menceli mutepeşis amiqones. Maartani Kianaş Limaş k’uleti İtilafişi oxen3alepek am Transilvaniaşi dixape Hungariaşen kayezdes do Romaniaş komeçes. Edo emuşeniki am p’roblemak amute va içodu do xoloti koren mteli xolo Transilvaniaş skidalaşi doloxe.
|
TÜRKÇE
