|
HEYBELİADAŞİ ŞURİERİ N3'OPULA
Osmanurepek Mp’oli ezdes şk’ule, Mp'olişi Ortodoksuri P’at’rik’is “Na3iaşi dudi” coxo gidvinu. P’at’rik’i işinu Osmanuri teres na skidut’u mtel Ortodoksepeşi go3’oncğoneri. Ortodoksuri religiaşi p’ap’azepe gamantanu şeni, iptinerot 1844-s, P’at’rik’i Maotxani Germanosişi mxuci meçamuten Aya Triadaşi Manast’erişi doloxe teologiuri gamantana na meçapt’u ar n3’opula guin3’k’u. Heybeliadaşi Şurieri N3’opulaşen 1844-şen 1971-şakis nanç’inerot şilya şuri gamantanerot gamaxtu. Am şurepeşen 12 p’ap’azi, ok’ule Mp’olişi Ortodoksepeşi P’at’rik’i iqu. 2 p’ap’azi İskenderiyeşi P’at’rik’i, 3 p’ap’azi Ant’akiaşi P’at’rik’i, 4 p’ap’azi Ti-muşiuri At’inaşi Dudp’isk’op’osi, 1 şuri Ti-muşiuri Albaniaşi Dudp’isk’op’osi i3xunu.
Heybeliadaşi Şurieri N3’opulaşi ist’oria aşo ren: 1844-şen 1915-şakis n3’opula rt’u şkviti k’lasoni. Antepeşen otxo rt’u lise, sumiti teologiaşi burme. 1915-şen 1918-şakis, Maartani Kianuri Limaşi sebebiten, Mp’olişi dido n3’opulapes na rt’u steri gamantanu dodgitu. 1918-şen 1923-şakis xut 3’anoni mağali n3’opulaşi st’at’u niçinu. 1923-şen 1951-şakis mcveşi şkvit 3’anoni gamantanaşi sist’emaşa guiktinu. 1951-şen 1971-şakis, em p’eriodişi P’at’rik’i Athenagorasişi şurdoguroni oxanduten xolo st’at’u muşi iktirinu. 1964 3’anaşakis namtini Balk’anuri dobadonapeşen, Egvipt’ia, Etiop’ia, Suria, Englandişen galeni mamgurepekti Heybeliadaşi Şurieri N3’opulas oncironot gamantana ezdu şeni mulurt’es.
1964 -1965 gamantanaşi 3’anas, galeni mamgurepeşi n3’opulaşa naqonu iyasağinu avt’orit’et’işk’elen. İnt’erna3ionaluri sperosti na içinet’u am n3’opula zarari z’iru. 1971-s, Turkias mtel uoxen3aluri mağali n3’opulapes oxen3alek xe na gedvu şeni, Heybeliadaşi Şurieri N3’opulati geink’ilinu. Andğaneri ndğas, Mp’olişi Ortodoksuri P’at’rikxanaşa mek’ireli Aya Triada Manast’erişi k’omp’leksişi doloxe 1993-şen 1998-şakis Teologia do Gomorgvaluri P’roblemape temaloni namtini ok’oxtala do seminerepe gei3’opxinu. Manast’erişa mak’itxepeti ulunan iroras. Mcveşi orapes am n3’opulaşen na gamaxtu do a3’i kianaşi çkvadoçkva k’arta sotxanepes mağali mak’amepes na renan mcveşi mamgurepekti mcveşi n3’opula mutepeşi mok’itxu şeni ulunan.
|
TÜRKÇE
