DUDBUT'K'A

NOXELE MOXTİ TUTA REMEZANİ

Allahişi inaet’iten şursağoba do selamet’iş doloxe Muslimanepe oqopinot opağu do oağanu çkinişi ç’k’ua na itazeninen, şaxsuri skidalas mereligialoba, so3ialuri skidalas huzuri, solidaroba do ok’oxtimu kesifurot na iskedinen, şurieri derece muşi dido mağali na ren do mogapa muşi irişen didi na iqven oxat’iru, mağfiret’i do bereket’işi ora na ren ağani ar Remezanişi tutas xolo komevunç’işit. Am tuta irixolos xvameri maqvan!

Remezanişi maartani ndğa k’ala arto çxant’a do feizi yopşa ar ora oskedinuşa gevoç’k’apt. Kiana işenen, dunia cennetişen na mulun çxant’eri ar havaten yipşen. Xvameri alemepeşi masumi do mubareği k’oçepeş irixolok macerepeşi gomorgvas ok’ibğernan. Raxmet’işi tereşen mujdepe, k’arta kianaşi Rabbişen selamepe do mağfiret’işi imendepe mumers Remezanişi tutak… Xvameri nena gyoncğonuşa geç’k’inu macerepe k’ala cinepe, melaikepe; nca, pukiri, xaşere, mgeri, k’vinçi, zuğa muşi k’ala mcveşi kiana çkinikti xvamups. Na iz’iren do na var iz’iren alemepes mtinişi metkvalaten muç’o eşo ar ç’andaş hava doligzen.

Remezanişi tuta; omujdelinu, oik’azinu, ok’oxtimoni, ucgişi oqopinu do osap’ruşi tuta ren. Xazret’i Muhammedik (Allahişi k’aoba do selami emuş jin iqvas) “3’oxleni muşi raxmet’i, oşkenda muşi mağfiret’i, çodina muşiti cehennemişen moşletinu” ren yado na molaşinaps Remezaniş tutaşi xususobape antepe renan:

1. Adamoba m3’k’upinobaşen na moşletinu do taneri ndğalepeşa na nunç’işinu, Allahi çkiniş çodinuri mesaji xvameri ketabi K’urani Kerimi, am tutaşi doloxe gyoncğonuşa kogeiç’k’u do aşopete irixolo adamoba şeni umengapuri ağani do xeleberi ar p’eriodi kogeç’k’u. Tevrat’i, Zeburi do İncili steri majura xvameri şurieri ketabepeti am tutaşi doloxe kagincğonu.
2. Alemepeşa raxmet’i oqopinot na nincğonu, yeçkindinerepeşi doloxe irişen fazilet’oni, Allahişi irişen maqorope k’uli, çodinuri peiğamberi Xazret’i Muhammed Aleyhisselamişa peiğamberoba am tutaş doloxe niçinu. Xazret’i Muhammediş am xvameri vazifeş geç’k’inuten m3’k’upinobaş doloxe uk’araroni na rt’u adamoba şeni teoni ar gza guin3’k’u.
3. K’urani Kerimis vitoşi tutaşen umosi xeironi ren yado na ignapinen do macerepeşa Allahişi irişen didi lut’ufi do ikramepeşen ar teri na ren “K’adirişi Seri”ti am tutaş doloxe ren.
4. Muslimanobaşi xuti şart’işen ar teri na ren, adamişi nefsi p’at’i ononapeşen do uşurieri didi ononapeşen na moşletinaps do adami muç’o eşo melaike na noktaps p’içva, am tutaşa meçineri ren.

Remezanişi serepes cemaat’ik didi ar xelebaten na ikips teravihişi nemaziti am tutaş doloxe na ixvenen ar ibadet’i ren. P’içverepes didi ar huzuri do şurieri xeleba na aqvernan moselaşi do iftarişi sofrapeti am tutaşa çkvaneri ar oxo3’onapa na meçaps xususobape ren.

Remezanişi tuta, raxmet’i, mağfiret’i do moşletinuş imendi na itazelinen, ibadet’i do p’at’i do k’aişi oxesap’u k’ala gurepek na ipağen, meşveloba, solidaroba, artoba do artikartobaşi şuri na isağen, çkvaneri ar so3ialuri ok’oxtimoba na iqven, ç’it’a na iz’iren ar ora ren. Na mevunç’işit am Remezanişi tutak, k’arta macere şeni na muğu raxmet’i, mağfiret’i do moşletinuş mujde iri macerepe do adamobasti anç’as, dobadona çkinişa, İslamiş alemişa do adamobaşa k’aobape muğas yado Rabbi çkinis vuxvamupt.