DUDBUT'K'A

XÇE ÇAİ ŞVİT-İ?

“Çaykur”ik jvari çaişk’ule go3’k’omila mutepeşi go3’o na içodinu do k’oçiş k’aoba şeni dido faidoni na ren xçe çai p’iasaşa kagamiğu. Xçe çai na ixvenen çaepeşi k’ump’urepeşi oz’iru dido meç’ireli na ren şeni pasi muşiti mağali ren. “Çaykur”ik ar k’ilogrami xçe çai p’iasas 500 liraşa gamaçaps.

”Çaykur”işi Generaluri Direk’t’orik am tema şeni antepe tku: “Xçe çai, çaişi morçepeşi eni jin na iqven k’ump’urepeşen ixvenen. Çaişi k’ump’urepe var guin3’k’aşa ik’oroben. K’ump’urepe guin3’k’aşi k’ualifika3ia muşi guindinaps. Am k’ump’urepe İgrik’aşi çodinas do Pukrik’aşi goç’k’as ik’oroben. Na ik’oroben k’ump’urepe çkini xes na ren Çaişi Go3’k’omilaşi İnst’it’ut’işi laborat’uaris higienurot xçe çai ixvenen. Xçe çai 20 gramoni baç’k’apes gamapçapt. Ar k’ilo muşişi pasi 500 lira yado vognapit. Çaiş k’ump’urepe ç’it’a na iqven şeni xçe çaiti ç’it’a gamulun. Xçe çais ç’ami steri k’ualifika3iape uğun”.

Xçe çaişi k’oçis k’aobaşa na irgen feidepe şeniti, “Xçe çaiş doloxe k’anseri blok’e na ikips mutxanepe ren. Antepek k’anserişi risk’i mejilapan. Edo xolo xçe çai k’ilo meçamu şeniti idealuri ren. Di3xirişi ak’t’iva3ia oxamp’aps, k’olest’iroli oç’it’anaps, hucrepe monz’inapaps, k’ibirepe var x3as yado çumers. Mk’ule nenaten xçe çai k’arta mutxanis nik’aren.” ya tku.



                                                                                                                                                              TÜRKÇE