|
AĞANİ QİNİ LİMA-İ?
Rusiaşi Galeni Dulyapeş Naziri Sergei Lavrovişi tkvalaten, Rusia ren kianaşi dudoçvalobaşi k’omisari do kianas dvaç’irs st’abiliza3ioni do akt’iuri ar Rusia. Kianaşi p’roblemapeşa çare oz’iramuşati, muşi dobadonak mxuci meçasen ya na tku, Rusiaş Federa3iaşi Galeni Dulyapeşi Naziri Sergei Lavrovik, Mosk’ovaşi Oxen3aluri İnt’erna3ionaluri K’ont’akt’epeşi İnst’it’ut’is, na ak’atu ar k’onferan3ias, fuze oçvalobaşi sist’emaşen K’osovoşa, ağani Qini Limaşen Lit’vinenk’oşi oğodobaşakis çkvadoçkva temape şeni beciti ambarepe meçu. Ğarğala muşis, kianaşi dudoçvaloba şeniti mutxanepe na gamatkvu Lavrovik “Var domaç’irenan mitepe eçkindu. Rusia var ren şkurina kianaşi dudoçvaluşa. Çkvanerot, kianaşi dudoçvalobaşi k’omisari ren Rusia.”-ya tku.
Kianaşi dudoçvaloba şeni, artonobaşi fakt’i omçiranuş dvaç’irobas na gyobaz’gu Rusiaşi Galeni Dulyapeşi Naziri Sergei Lavrovik; Rusia, Avrop’aşi Artonoba do Amerik’aşi Ok’ont’aleri Oxen3aleşi şkas k’oop’era3ia omçiranuşen “mendra do okaçeri” na ren gamatkvu. Rusiaşi okaçeroba do dudoçvaluşi sup’ap’i oqopinuşi misias becitobaten na gyobaz’gu Lavrovik aşo tku: “Rusia, Avrop’aşi Artonoba do Amerik’aşi Ok’ont’aleri Oxen3aleşi şkas ar p’roblema na ren, aşikari ren. Mara, Avrop’aşi Artonoba do Amerik’aşi Ok’ont’aleri Oxen3ales uğunan xolosonoba namtini temape şeni. Umosi beciti na ren, Avrop’aşi Artonoba do Amerik’aşi Ok’ont’aleri Oxen3alek na o3’irapan oşkendari dodginobak gza var meçaps çkini obiekt’uri gagnapas.”
Amerik’aşi Ok’ont’aleri Oxen3alek Avrop’as ok’idu na unon dudoçvaluşi fuzeş sist’emapeşi zemcape şeni mamgurapeşi k’itxvapeşa nena na gyuktiru Lavrovik dudoçvaluşi fuzeş sist’emape şeni “Ok’oxtala var ixvenasunon”-ya tku. Namtinepeşk’elen am tema udodginu t’u3a ikaçinen ya na tku Lavrovik “Miti k’ala var bğarğalaminonan am tema. Aya ren çkini k’arari.”-yadoti oxo3’onapu.
|
TÜRKÇE
