|
RUSİA AVROP'AŞİ ŞAMP'İONİ İQU
Avrop’aşi 35. Kimoluri Bask’et’boliş Şamp’ionobas, oxormance Esp’ania na gyocginu Rusiak, şamp’ioni iqu. Rusiak, Madridis na isterinu finalişi maçis kianaşi şamp’ioni do t’urnuvaşi irişen didi favori na rt’u Esp’ania 60-59 sk’oriten gyocginu do didi ar surp’rizi qu. Şamp’iona Lit’vaniak masumani, Grek’iak maotxani oqopinot oçodinu.
So doskidu em mcveşi orapeşi Yugoslavuri do Sabçoeturi bask’et’boliş k’ult’ura do osteramuş fenti muşi. Dido var am jur terepek na kodolixves orapeşen m3ika çkvaşi ora na rt’u 1995 Avrop’aş Bask’et’bolişi şamp’ionobaşi finalis Yugoslavia do Lit’vaniak istereet’es. Aris Yugoslaviaşi ek’oliş, majurasti Sabçoetişi ek’oliş osteramuşi fenti uğut’u. Kurtiniatis, Marçulianis, Karnisovas, Sabonis steri sup’erit mabask’et’bolepek Lit’vanias; Corceviç, Daniloviç, Bodiroga, Obradoviç, Saviç, Paspalj, Divaç steri sup’erit mabask’et’bolepekti Yugoslavias istert’es.
An3’ineri Yugoslaviaş bask’et’boliş osteramuşi st’ilik am mcveşi dobadonaşen ok’o3’k’imeri ar jur dobadonaşk’elen kaiskedinasnati eşo mcveşi orape steri sup’erit mabask’et’bolepe va gamağenan do xolo Sabçoetişen ok’o3’k’imeri dobadonapekti eşo. Am dobadonapeşi doloxe Sirbist’ani do Lit’vaniak arm3ika 3’oxle renan mara so rt’u entepeşi mcveşi sup’erit mabask’et’bolepe, mutuskani va doskides. Esp’ania, Grek’ia do İt’aliak em orapesti mordineri bask’et’boliş k’ult’ura uğut’es. A3’iti xolo eşo mordineri bask’et’bolişi liga uğunan muç’o eşo mcveşi orape steri. Antepeş doloxe Grek’iaşi bask’et’boliş st’ili k’arta oras çkvaneri t’u do Grek’iak, Sabçoeti do Yugoslaviak bask’et’bolişi p’iasas irişen menceloni na rt’es oras 1989 3’anas Avrop’aşi şamp’ioni iqveret’u.
Didopete topişi oktu, bask’et’bolişi didi çkinapa, k’oçişen oşletinoba do şutiş ostomiluşi gecginapa, ginz’e mabask’et’bolepek k’uçxe mutepeşişi sterapete rakibi mutepeşişen oşletinu do p’oint’işi oxvenu, 1, 2 do 3 nomeroni p’ozi3iapeşi mabask’et’bolepek am p’ozi3iapeş mteli xolo k’aixeşa osteramu mutepeşi, 4 do 5 nomeroni mabask’et’bolepek galendo do doloxendo bask’et’boliş çkinapete do dido orapesti galendo cgiraleri moxtimeri p’oint’işi oxvenu, asist’işi didonoba, artikartis şvelaşi didonoba steri otkuten do oç’aruten na va içoden xususepek Sabçoeti do Yugoslaviaşi bask’et’bolişi doloxe dido mç’ipaşaşi do mencelonişi skidut’u.
Şamp’ionobak kogeiçk’uşi k’arta uçkinapu do ugagnoni avt’orit’ek Esp’ania favori şinapt’es do eşopeten isimadept’es. Esp’aniak menceloni rt’u mara 3’oxleni orape muşi steri menceloni va rt’u do k’ap’ineri, irişen dido şut’iş ostomiluşi jin gedgineri, potaşi tude dominant’i na qvasunon upivot’one, artiartis arxvala rak’ibi muşi ekart’e qveri vana rak’ibi muşiş xeşi jinşen şut’i na ostomilasunon muç’o eşo xuraş mencelişi gedgineri osteruş st’ili na uğun Amerik’aşi bask’et’boliş st’ili istert’u do an3’ineri orapes em mcveşi Sabçoeti do Yugoslaviaşi st’ili dido var t’asnati na istert’u Grek’iak dido p’at’işi uformuri t’u.
İri xolo k’oçis açkinet’uki oşkenda arxvala Esp’anias elaskideret’u do mtelixolo gecginobape entepes anç’ert’es. Mara iri xolo k’oçis na goç’k’onderet’u ar mutxani t’u. Rusiakti am t’urnuvaşi doloxe rt’u, Sabçoetiş bask’et’boliş ek’oliş maandere rt’u, dido didi ar dobadona rt’u, bask’et’boliş menceli muşi dido mordineri t’u. 3xaperi Amerik’aşi bask’et’boli va istert’es, mtinişi bask’et’boli istert’es, dido menceloni bask’et’bolişi 3’oxlena mutepeşi uğut’es do an3’ineri orapes am 3’oxlena mutepeşi ağanerişi xolo gamiqonupt’es oşkendaşa edo emuşeni şamp’ioni iqves.
Çodinaşi metkvalepete doptkvatna, Yugoslavia do emuşen ok’o3’k’imeri dobadonapes bask’et’bolişi gecginobape a3’iş k’ule bekimti çkar oras 3’oxleni orapeşi menceli va aqvasunonan, muşeniki am globaliza3iaşi kianas, sp’ort’ik ipti do irişen dido geç’arelite na işinen oşkendas, mcveşi k’olekt’iuri sist’ema mutepeşi na kodolixu şeni menceli mutepeşiti duğures. Dido ç’iç’it’a dobadona na ren Lit’vaniasti, ne ek’onomia muşi neti sp’ort’iş oqopinu muşi Sabçoetişi eşo didi anderoba, dido ginz’e p’eriodişi doloxe va atireet’u. Didi do mcveşi menceloni 3iviliza3ia do sp’ort’iş ek’oli do xolo k’ult’ura na uğun ar dobadonak namtini orapes bekim oşkendas va iqven mara dğa mulun xolo mcveşi anderi muşi miti skanis va naşkumers. Didi oxen3aleş oqopinoba çkvaneri ar oqopinoba ren do sp’ort’iş dulyapeş doloxeti am çkvanerobak k’arta oras stena muşi onagnapasunon mtelixolo k’oçepes muç’o eşo Rusia do Rusiaşi şamp’ionoba steri.
|
TÜRKÇE
