|
ÇKİNİ BEROBAŞİ İZMOCE MAP'AZULEPE
Map’azule ren Lampyridaeşi familiaşen. Pukrinora do monç’inoraşi tutapes iz’iren seris. Ar k’ele putxun, majura k’eleti muşi tenak udodginu tanups do meskirun. Kimolepe msvaloni do 3’unape umsvaloni renan. Muşi larvapes nungapan. Muşi namtini ç’eşidepes, kimoli, 3’una do larvapekti omralapan tena. K’arta sort’is uğun ti-muşiş signalişi şifre. Oçildre Amerik’as na skidun namtini ç’eşidepeşi 3’unapeti renan msvaloni. Omralapan tenati. Mtel map’azulepeşi larva do ağanmordalepe renan xor3imç’k’omu. Çiçku bombola do bombolaşi larvape oç’k’omuten skidunan.
Map’azules uğun muşi tenaşi organepe korbaş k’ortaşi çodinas. T’ransp’arant’i na ren ar t’abak’a motun. Doloxeni k’ortas iz’iren fot’ogeniuri hucrepe do tena na omeğalups ar t’abak’a. Tenaluri organis na imralen do yağis na nungaps Lusiferini coxoni maddek tamo-tamo iç’ven ok’sijeniten lusiferinaziş enzimişi ok’at’alizat’orobas. Am kimialuri p’ro3esi k’ala gamulun tena. K’ont’roliten, havaşi ok’sijenişi oxmaruten, tenak tanups do meskirun. Am otanu do meskirinupeşi gzatenti artikarti k’ala ok’iambarupan. Map’azulek na omralaps tena, ora golaxtimuten na gamulun ojanguten, kimialuri energiaş tenaşa goktinu ren. Tena ren qini mtelot. Map’azules var iz’iren t’u3anobaşi gondinu.
Map’azulepek serişi, T’ailandis, ğalişp’icis, gvak’irenan Ton Lampooşi ncapes. Am map’azulepek tanupan do meskirunan 120 fara ar 3’utişi doloxe. Ekonaşi itanen gverdi sek’undişi doloxe, mitam na valeren steri. Jamaik’asti, dido çxant’eri renan map’azulepe. Map’azulepek t’ot’epes ok’ibğanşi, ncape iç’ven steri iz’iren xutoşi met’ro mendranobaşen.
|
TÜRKÇE
