|
MAT'K'OBİNALE ĞAPİŞÇXOMİ
Ğapişçxomi ren dudişen t’rik’onepeşi (Cephalopoda) k’lasiş vitxanç’alonepeşi (Dekapoda) k’erk’elişen. Zoğapes skidun. Çiçkunari ren. Oşvanuşiten şuri şvanups. P’icişk’elen uğun vit xanç’ali. Juri xanç’ali ren umosi ginz’e majuranepeşen. Moşvacinuşi oras, amozdaps muşi xanç’alepe. Dvaç’iraşi, gamoginz’anaps muşi xanç’alepe avi oç’opu do ti-muşi oçvu şeni. Muşi xanç’alepeşi doloxeni jilenp’icis iz’iren dido vant’ozi. Vant’ozepeşi doloxeni k’elepe renan k’ibironi do kra steri. T’ibu do mçxvapa zoğapeşi p’icuri 3’k’arepes iz’iren. Muşi ginz’enoba ren 20 sant’imişen 18 met’reşa. Entepeş didopeşi ginz’enoba ren 50- 60 sant’imi. Xçezoğaşi p’icepes avi ç’opups. Maxare ren. Çxomi, k’aridesi, ç’ağana do majura çiçkunarepeten skidun. Ğapişçxomik nanç’en muşi mt’erişa k’ap’ulaşk’elen. Mestikups avi mutepeşiş omurilik’i gyak’ibinuten. Avi mutepeşi nuzuli oğoduten oxre3kinaps. Ç’opups muşi mt’eri vant’ozepe muşiten. Muşi xanç’alapetenti p’ici muşişa amidumers.
Ğapişçxomis uğun dido k’ap’et’i ar kuni, gagnaburi meşuraşi gagnapa, korbaluri ar me3adaşi gagnapa do dido gagnaburi tolepe. Muşi didi tolepes uğun sumeneçdovit milyoni z’irapaşi hucre. Z’irapaşi spero ren sumoşidosumeneç derece. Az’iren muşi k’ap’ula perpot. M3’k’upi 3’k’arepes, oşuruşi gagnapaten muşi avepe so na renan şuri ugnaps. Nevruli sist’emaşk’elen na ik’ont’rolinen k’romot’ofori coxoni peri oktiruşi hucrepeten, ti-muşi impulaps. İridosist’i coxoni, muşi t’k’eburi hucrepekti meğalups tena. Peri oktiruşa gza meçaps. Ment’k’obups. Kvişaşi doloxe gyant’onuten ti-muşi impulaps.
Muşi p’icis uğun p’ap’ağanişi k’ik’ili steri menceloni mamkvale. Amkven ar ç’ağanaşi t’k’ebi varna çxomişi dudi perpot. Muşi cinikişi t’k’ebiş tude uğun ç’it’a kralurişi ar xeç’ep’a. Am xeç’ep’a ren xut’uloni. Am xeç’ep’a havaten yepşeri ren. Ti-muşiuri monk’anoba 3’k’arişen m3ika ren. Aşopeten 3’k’arişi doloxe do gale ulun- mulun. Muşi di3xiriş goxtimuşi sist’ema ren genk’ileri. Muşi oşvanuşepe renan mant’oşi gamaçodinurobas. Mtel xura muşi noç’aberi ren ar onçviruşiten. Oşvanuşi şvelaten tamo-tamot inçvirs. Goktaps muşi xura. Onç’unoba do nodgitinobaşi sist’ematenti k’ank’alaps. Aya oxvenu şeniti, mant’o muşişi upşobaşa ezdimeri na uğun 3’k’ari korbaşi k’ortas na uğun xunişi meşvelinuten galenk’elen dobups. Xunişen 3’k’arik dibert’aşi na yoçkindaps nodgitinoba k’ala astaxolobaten mele mole imt’en. 3’k’ari meçxap’aşi 37 km-oni ar surat’i aqven. Maşkurinobaşi moment’is na meçxap’ups do ti-muşişi formişa na nikten ğapişi mpulaten mt’eri muşi moğerdinaps. Artneri orasti, mt’eriş oşuruşi gagnapas nuzuloba oğodaps. Am ont’alas imt’en muşi mt’erişen. Namtini sort’epeş ğapişi k’esek ixandeps, doloxe muşi na otanaps bakt’erepeten pşeri k’esep’inape k’ala artot. Aşopetenti, na meçxap’inaps ğapik tenaşi tk’va3inoba steri iz’iren. Mt’eris toli doluçxant’ups. İrişen didi mt’erepe muşi ren k’at’uşçxomi, coğorişçxomi, fok’i do balina.
Ğapişçxomik imralen markvaliten. Omraluşi oras, muşi xura imskvanen zebra steri uçala ğarapeten. Çili do kimoci ğapişçxomepe artikartis gvak’irenan. Saat’epeşi morgvalis, itirinenan 3’k’aris. Markvalepeşi otasinu ixor3elinen 3’unaş mant’oşi gamaçodinurobas. Taseri markvalepe tito-titot varna muk’usoni k’erk’elepe oqopinot svaşa naç’aben. 3’unak zoğap’icişa naxolen monç’inoraşi tutapes. Naşkumers muşi markvalepe kva do ğvelepeşi şkas. Muşi ğapiten antepe uça perişa noktaps. Markvalepe iz’iren qurz’enişi ç’aba steri. Emuşeniti, am markvalepes itkven zoğaşqurzeniti. Omordinu ren umet’amorfozoni.
|
TÜRKÇE
