|
ART'AŞENİS MAARTANİ OĞODA: LAZURİ MEZAREŞ KVA
Lazuri na omanceps do oskedinu şeni gza na gorups mitxanepeşi nak’onoba irden k’artandğas. Ağandobaderi berepe muşis Lazuri coxope na gedumenan nana babapeşi ambarepe vik’itxupt. Dukyani mutepeşis Lazuri coxo na meçapan esnafepek iqvenan p’resaşi tema. Çodinuri ambari, Lazuri nena ist’oriurot na iğarğalen ilçepeşen ar teri na ren Art’aşenişen momixtes. Lazuri nenaşi becitoba na uçkin do nananena muşiş oskedinu na unt’u Muzaffer Akay coxoni dobadonamşine çkinik ğurut’uş ekole, vesiet’i oğoderen cuma muşi Fevzi Akayis: “Ma skanden 3’oxle bğurina, sapulaş kva Lazuri domiç’arapi!” 1933 3’anas Art’aşenis na dibadu Muzaffer Akayik şuri muşi Ğormotis meçeren 2000 3’anas. Murenki cuma muşi Fevzi Akayis var axveneren am vesiet’i çkvadoçkva sebebepeten ginz’e 3’anapeş morgvalis.
Golaxtimeri tutas, Fevzi Akayik oxor3elu, ğureli umçane cuma muşişi vesiet’i. Art’aşenişi raioni Çiftekavakis na skidun Fevzi Akayik aşo noç’arapu umçane cuma muşişi sapulaşi kvas Lazuriten:
“Cuma şkimi
Muzaffer Akay
(1933–2000)
Cevulur eşkevulur
Bgarineri noğaşa
Mogoişaşer cuma
Komeftana tobaşa”
Aşopeten Art’aşenuri tek’audi p’olk’ovnik’i Fevzi Atayik xeşç’ara gedvu spero muşis ar maartanobas, Turkias, Lazuriten sapulaş kva oç’araputen. Na içkinen Lazuriten mezareş kva ren Xasan Helimişişi. Okorturaşi Lazi oput’e meleni Sarpişi oğurunales doxveri Xasan Helimişişi sapulaş kvas aşo noç’ars:
“Skidalaşen mana manç’en kaebzdi. Man am dunias em duniaş derdi var bzdi.“
|
TÜRKÇE
