|
SAVAŞ DİNÇELİ DOĞURU
Teat’ri do sinemaşi masağale, rejisori do k’arik’at’urist’i Savaş Dinçelis, 3’oxlenoras na iqveret’u op’era3iaşi sebebiten gamaxtimeri ar k’omp’lik’a3iaten 20 Mariaşina 2007 tariğis, Mp’olis oxori muşis, doloxeni di3xirişgamaxta ağodu. Artneri ndğas, oxzabune Memorialis, şuri muşi Ğormotis meçu.
Savaş Dinçel dibadu 1942-s, Mp’olişi ç’it’anoğa Fatihis. Koca Ragip Paşa coxoni geç’k’apuroni n3’opulas ik’itxu şk’ule, Mp’olişi biç’uri lises niç’aru. Teat’rişi gamantana muşis kogeç’k’u Mp’oliş Belediyeşi K’on3ervat’uariaşi Teat’rişi Burmes. Amat’orot k’arik’at’urepe doğaru. İptinerot Mp’olişi Noğaluri Teat’repes eç’opu saxne. 12 St’aroşinaşi xe3alaşk’elen gamiçkvineri 1402 k’ore3xaloni Malimuri Oktalaşi K’anoniten geit’k’oçinu teat’rişen. Qu k’arik’at’urist’oba Oz’i3inuri Gamantanaşi Şkaguronis. İxandu k’arik’at’urist’i oqopinot Gazeta “Gunaydin”is sumi 3’anaş morgvalis; xaziru “Tonton”işi bandepe. Gon3’k’u jur k’arik’at’uruli merçapa. Munir Ozkulişi Teat’ris, Ank’araşi Xeşnoxvenuri Teat’ris, Gen-Arişi Teat’ris, Miyatro Dobadonamşinuri Teat’ris, Şan Muzikholis do Ali Poyrazoğluşi Teat’ris ixandu. Daniştayişi gonk’vataten goiktu do xolo kogeç’k’u oxanduşa Mp’olişi Noğaluri Teat’ris. “Ğarapeten Nazim Hikmet” coxoni ğaruli romani muşi, xe muşiten qu. Murenki am svara imusaderinu do Sekaşi fabrik’as kart’aliş 3omi ixvenu.
Savaş Dinçelik qu masağaloba do rejisoroba Mp’olişi Noğaluri Teat’ris, çodina ndğa muşişakis. Amat’ori ğara do afişişi dulyape k’alati iboderet’u. 21 Xrist’anaşi P’araskeş ndğas, maartani 3eremonia i3’opxinu Noğaluri Teat’rişi Muhsin Ertuğrulişi Saxnes Savaş Dinçeli şeni. Ok’ule cenaze muşi mendiğinu Teşvikiyeşi meçetişa. Akonaşis na ixvenu ondğeneri nemazi şk’ule, ixvenu cenaze nemazi. Savaş Dinçelişi cenaze niçinu let’as Zincirlikuyuşi oğurunales. Çileri na rt’u Savaş Dinçeli rt’u Bariş Dinçelişi baba.
|
TÜRKÇE
