|
KOBULETİŞİ MEÇETİ CİNCİ MUŞİŞA GUİKTEN
Aç’aristanis dansi do baleşi doguroni oqopinot na ixmarinen Kobuletişi meçeti cinci muşişa guiktinen. Batumişi came na moik’itxu Okorturaşi P’rezident’i Mixeil Saak’aşvilik, Kobuletişi meçeti originali xali muşişa uk’uniktinasunon yado ognapu. Osmanuri p’eriodis na ik’idu Kobuletişi meçeti, Soviet’uri p’eriodis, regioni Bolşevik’epeşi k’ont’rolişa amaxtimu k’ala geink’ilineren, dansişi doguroni do teat’rişi saloni oqopinot oxmarinuşa geiç’k’ineren.
Batumişi cameş mok’itxas Dudmufti Bekir Bolk’vaz’e, ilçeşi muftepe do qalaboni ar cemaat’işk’elen na niginu Saak’aşvilik, Muslimanepe k’ala ok’uiğarğalu do entepeşi p’roblemape isiminu. Emoras Kobuletişi Mufti Aslan Beriz’ek nenaş izni eç’opu do Soviet’uri p’eriodişen doni dansişi doguroni do teat’rişi saloni oqopinot na ixmarinen Kobuletişi meçeti xolo cameşa goktinuten noğira muşişa moxva oxmarinu şeni Saak’aşvilişen şvela ak’vandu. Okorturaşi P’rezident’i Saak’aşvilikti, goşovigoraminon do mu na mçitunna p’aminon ya tku.
Soviet’uri Artonoba guşibğuşi timoşletinoba muşişa na nunç’işu Okorturak, k’ap’it’alizma şeni oxandus geç’k’eren do amuşeni xususuronobaşa manişaloba meçeren. Na molişinen Kobuletişi meçeti, xususuronobaşi p’rogramas na gamaçinasenpeşi list’eşa eizdineret’u. Kobuleti, Okorturaşi irişen mskva p’laji na uğun semp’at’iuri ar noğa ren. Noğas am xususobaten t’urizmişi ok’rebuleş st’at’u uğun.
Kobuletişi meçetis cinconi fonk’sioni muşi meçamu, dido manişa oçodinu na çitun ar tema ren. Na niçinu nenapes, 3xuna şeni meçameri do oxvenu şaiboni vaadi uoqopinu dvaç’irs. Artneri oras Batumişi cameşen ezani ok’itxinuşa izni meçamu çitun. Regionis huk’uk’urot na uğun religiuri do k’ult’uruli avt’onomia, Muslimanobaşi ibadet’i oxvenuşa gza meçamu şeni dobağineri ren. Am hak’k’iş meçamu, huk’uk’uri avt’onomia k’ala adalet’uri oktalaş gagnapaşi dvaç’iroba ren.
|
TÜRKÇE
