|
ART'AŞENİŞ SİLAXİŞİ FABRİK'AK OMRALAPS!
Art’aşenis na ixandeps Art’aşenişi Silaxiş Fabrik’a (Asilsan A.Ş.), 1991 3’anas Kosgeb-işi go3’oncğonerobaten, 99 oşkendari do 6 miliari Turkuli Lira k’ap’it’alonot, Noğaşi Muşeburoba Oktala do Tesk-işi ak’atuten k’ideri ren. Maartani omralobak geç’k’u 1993-s. Mraleri 50 p’rot’ot’ip’i niçinu MKE-s. Mraleri 9x19 mm k’alibroni 15+1 P’arabellumiş mermişi k’ap’asit’oni Atmaca 53 coxoni silaxepe MKE-şi k’idalaşa niçinen. Edo, MKE-şi k’idalaşk’elen gamiçinen.
Omralabos Avrop’aşi st’andart’epe aqvas do oxoşkveri p’iasas rek’abet’işi menceli manz’inas yado İSO 9001 k’alit’eşi dok’ument’i do NATO-şi st’andart’işi k’odeksiti ezdimeri uğun. 1997- 1998 3’anapes, irişen meçamura p’eriodi na skidu Asilsan-ik 140 madulye muşi k’ala, ar 3’anas nanç’inerot 6 şilya do 500 t’abanca omralapt’u. Ok’ule, opazaruşi p’roblema na z’iru Asilsan-ik oç’it’anus kogeç’k’u ar 3’anaşen majuranişa. Am p’roblemape na iskedinu 3’anapes, p’roblemape eyonçxaluşi simadaten, Asilsan-işi oşişen 67 k’orta Noğaşi Muşeburoba Oktalaşa niçinu. Murenki p’roblemape xoloti var eyançxalinu.
17 Gimua 2007 tariğis na ixvenu ihales irişen mağali tek’lifi na meçu Arpet-ik (Art’aşenişi P’et’roliş Omralobapeşi İndust’ria) 115 şilya 500 Ağani Turkuli Liraşi ğirsobaten eç’opu Noğaşi Muşeburoba Oktalas Asilsan-is na uğut’u oşişen 67 k’ortaloba. Valilobaşk’elen ihale itesdik’inu şk’ule ağan-gagnaponi dulyapek kogeç’k’u Asilsan-is. Arpet-işi timçxupek, fabrik’as ginz’e orapeşen doni na iz’irinu ek’onomik’uri k’rizisepe eyonçxalu minonan do ağani ar nank’ap’aten omralu osağuşi noğira miğunan ya tkves. Not’eriti na dodgiturt’u arsotxanis xveneri çodinuri ok’otkvalaşi ezdu-meçamu şk’ule Generaluri Direkt’ori Ekrem Yazicik meçu fabrik’aşi nk’ilape Arpet-iş Oktalaşi K’omisiaş Dudmaxvence İlhan Eskiçirakis. Andğaneri ndğas, Arpet-ik oxen3alaşi borcepe na meçu do kari na qu, ignapinen.
|
TÜRKÇE
