|
NCA İK'VATEN-İ?
An3'ineri 3'anapes nca muç’o eşo pi3arişi xçe okro steri ren. Mara, Turketuri K'olxepek, na skidunan ç'it'anoğapeşi xampa germapunape k'ala yopşa na uğun dixapeşen didopete faide va aqvenan.
Hukumetişi germaş dixapeşen 3'oxle na rt'u steri a3'iti mutu skani faide va uğunan. Hukumetiş xes na ren, didi 3'ipuroni, 3xemuroni do çkva do çkva dido ncaş k'ategorioni xampa germapunape yipağu. Bekim am gamaçamuşi geç’arelepe İMF şi faizişi borcepes nulun, mis uçkin en k'ai Ğormotis açkinen. Em na ik'vatinen mtelixolo ncape dido mendra didi noğapeşa nulun. Turketuri K'olxepek na skidunan ç’it'anoğapeşi çkaris mutuskani mobiliaşi var na ncaş sekt’ori şeni met'k'oçit exp’ort’işi oxandu na ikips fabrik’a, Turketiş doloxeni p’iasa şeniti na ixandeps ar tana fabrik’ati va ren.
Romaniaşi doloxe T’ransilvania coxoni ar didi ist’oriuli pağa ren. T’ransilvaniaşi ncaş sekt’ori dido mordineri ren, dido çkva dobadonamşinepeşi fabrik'ape, k'onsorsiumepe renan ncaş sektori şeni. Turketuri K'olxepek çxundi na drik'upan txomuş pi3arişenti dido dido mobiliape ikipan. Am sekt’oris, Amerik'uri presoni nek'na (mtelixolo kianaş na dvaç’irs %25 am pağas ixvenen), pi3arişi lambiri, pi3arişi ak’oşka, tudele na svarupan pi3arişi p’ark’e, mobiliape do çkva do çkva dido mutxanape ixvenen T’ransilvanias. 3'anas minimurot 2 milyar dolari ren am T’ransilvaniaş pi3ariş sekt’orişi sirk’ula3ia.
Romenepeşi mtelixolo hukumetepek didopete do gurite mxuci meçapan am pi3arişi sekt’oris. Mara Turketuri K'olxepeşi dixapes, T’ransilvanias na uğun ncapeşen umosi dido ncape res do xolo hukumetişi germapesti xolo eşo. Mara an3'ineri orapesti xolo sobapes dişkape ç’upan, muşeniki nat'ureli gazi na skidunan ç’itanoğapeşa moxtimeri va ren. Dido mendra var, xolos mutepeşis yani ki Batumis nat'urali gazişi xat't'i ren. T’ransilvanias miti skanik nca va ç’ups. Nat'ureli ugazoni k'oçişi nobarge çkar na var steri ren.
|
TÜRKÇE
