DUDBUT'K'A

SAMARGALOS TXİREPUNA DO TXİRİŞİ SAKVARİ

K’oçi imenditen skidun ya, eşo tkverenan, edo aşoti ren, imendi iriş çodinas ğurasunon. İri pukirobaş moxtimus am imendi guin3’k’en Samargalos, edo muşeni aşo iqven a3’i gi3’vatminonan.

Txiri irişen beciti p’roduk’t’i ren Samargalos. Tamo tamo eya mteli Okorturaşeniti beciti diqu, ğirsi muşiti didi uğun do k’ai cişiti ren Samargaloş txiri. Emusteri txiri xvala ar svas gamulun – Uçazoğaş k’elen İngur 3’k’ariş marz’ğani do k’vazali svapes, a3’i eya ren Zugdidi noğaş oput’epe do İngur 3’k’ariş meleni sva, an3’ineri Apxazetiş oput’epe. Am svapeş maskidalepes txiri 1-2 hekt’ar dixas uğunan txirepuna do iri 3’anas 3-5 t’ona txiri k’orobupan. Txiriş ok’orobu Mariaşinas tutas iqven, gamaçamu şeni Zugdidiş bazarişa muğapan ğirsoni Çxalva do Gumatutas mak’simaluri ren do 1kg txiri 2-3 $ (4-6 lari) ğirs. Dido xeironi dulya na ren şeni, txiri do txirepuna onç’eloni ren do amuşeni ekonurepek, Turkepek, Berz’enepek, Rusepek txiriş oxaziruşi fabrik’epe gon3k’es Samargalos tutas 6000 t’ona txiri ixaziren do eksp’ort’işa gamiqonupan Margaluri txiri. Txiriş dulya aşo na ren şeni, majura sakvari, Samargalos na ren lazut’i, mitis var onç’els, edo mitis uğun na lazut’iş qonape, am 3’anaş k’ule mtelis var xaçkupan do amuş svas txirepuna ikipan.

A3’i mteli Okorturas 20.000 hekt’ari let’a uğun txirepunas (95% Samargalos) namtini svapeşa (Guria, İmereti, K’axeti) nimernan nergepe do orgapan edo eşo 2008 3’anaşakis 40.000 hekt’ari txirepunaşi oxvenu isimadapan. Txiri beciti eksp’ortoni p’rodukti iqvasunon na didi parati muğasunon muç’o Okorturaşeni eşoti Samargaloşeniti do mxuçi meçasunon ekonuri xalk’epes am meç’ireli oskedinus.



                                                                                                                                                              TÜRKÇE