|
LAZİSTANİŞİ FENERİ: ATENASP'ORİ
1973 3’anas na ik’idu Atenasp’ori, ik’iduşi jvari do xçe na rt’u perepe muşi 1990 3’anas 3aşperi do xçe yado otescilu. 1991- 1992 sezonişen doni Turkiaşi p’rofesionaluri ligas na isters Atenasp’ori, 2004- 2005 sezonis 3. ligaşi 2. grup’is şamp’ioni iqu do 2. ligaşi B k’at’egoriaşa yextu. A3’i xolo 2. ligaşi B k’at’egoriaş 4. k’lasmanuri grup’is isters. 2005- 2006 sezoni 6. oqopinot doçodinu. Maçepe muşi 2.500 k’ap’asit’oni noğaşi st’adis isters. Atenasp’orişi k’ulubis basket’boli, voleyboli do st’oliş tenisişi amat’oruli branşepe uğun. K’ulubişi Dudmaxvencoba Huseyin Yangin, T’eknik’uri Direkt’oroba Oktay Çevikişk’elen ixvenen.
K’ulubişi butçeş doloxe çaişi maomralepeşi omxvacuk dido beciti odude oteşkilaps. Am odude vart’asna Atenasp’orişi k’ulubis var askedinen. Noğaşi-regionişi, ofi3ialuri-xususi k’idalapeşi sp’onsorobati k’ulubis na mogapaps do na numxvacups beciti fakt’ori ren. Regionişi irişen didi indust’rialuri k’idala na ren Çaykurik, k’ulubişa k’idalurot mxuci meçaps. K’ulubiş, Turkiaşi majurani fut’bolişi ligas gecgineri oqopinu şeni t’eknik’uri do ek’onomik’uri xandapes na naqonops oktalak, otesisuşi temas beciti dulyape ikips. Noğaş st’adişi çimepe iağaninu, port’at’ifi marat’onişi t’ribuni i3’k’u do bet’onişen ixvenu. Am t’ribuni motvu şeni oxandus niqoninen. Zuğap’icişk’elen na yipşu sahas 40x60 met’re ebat’oni sentetik’uri çimi saha do ant’remanişi tesisi guin3’k’u. Moxtasneri 3’anas, masp’ortepek na dodgitasunonan moderni do luksi moşvacinuşi do gamantanuşi ok’rebule ip’rojelinu. K’ulubişk’elen çimi na irginu sahas sp’ort’uli lise na ik’idasunon şeni, K’aimak’amobak k’ulubişa na meçu Xemşinişi gzas jin 20 dek’aroni sahas, amat’ori t’akimepekti ofi3ialuri maçi na axvenasunonan sentetik’uri saha k’ala k’ulubişk’elen na ixmarinasunon ant’remanişi jur saha, dolokunu oktiruşi odape do gamantanaşi ok’rebuleş oxvenu ip’laninen.
Atenasp’orişi k’ulubis do Atenaşi xalk’is na nuxizmet’ups k’ulubişi tik’onozi Huseyin Yangini do ekibi muşişa gecgineri xandape vimendupt.
|
TÜRKÇE
