|
ABXAZİAK, OÇİNU ŞENİ NUÇ'ANDU!
Abxaziaşi P’arlament’ok, int’erna3ionaluri so3iaşen timoşletineroba muşiş oçinu na ak’vandeps k’arari dotasdik’u. Ok’ok’ateri Na3iape, Avrop’aşi Artoba do Avrop’aşi Emniet’i do Solidarobaşi K’idala k’ala kianaşi k’arta oxen3alepeşa, Abxazia oxoşkveri do timoşletineri oxen3ale yado oçinuşa na iç’andinu k’araris; “Gulvaluri terepeşi didopeş K’osovaşi timoşletineroba oçinuten geop’olit’ik’a beciti nispet’iten iktiru do Abxaziaşi timoşletinerobaş oçinuşi şart’epe ixor3elinu. Oxoşkvineroba do timoşletinerobaşi hak’k’i k’arta mitxani şeni artneri ren. Abxazia 15 3’anaşen doni gecginerot timoşletineri oxen3ale oqopinot koxvaskidu” ya itkvinu. P’arlament’ok çkvaneri ar ognapatenti Rusiaşi p’arlament’oş tudeni no3’ile Duma k’ala jindoni no3’ile Federa3iaşi K’onseişen Abxaziaş oçinu ak’vandu. Dumaşi int’erna3ionaluri k’ont’akt’işi k’omit’eş dudmaxvenci Leonid Slutskik, Rusiaşi p’arlament’ok irişen mk’ule oras am tema şeni ok’uixtalasunon ya tku.
Abxaziaşi P’rezident’i Sergey Bagapşikti, K’osova timoşletineri oxen3ale yado na içinu int’erna3ionaluri so3ia, juroni st’andart’i naşkvinuşa uç’andu. Abxaziaş p’arlament’oşi dobadonaş timoşletineri do oxoşkvineri oxen3ale yado oçinu şeni oç’andinu şk’ule magazetepeşa na nuğarğalu Bagapşik, “İnt’erna3ionaluri so3ia, juroni st’andart’i naşkvinu do Abxazia do Omjore Osetiaş timoşletinerobaşi oçinuşa vuç’andept” ya tku. K’osovak çkvaneri dobadonapeşa emsali var iqvenşi t’ezi na moivaru Abxaziaşi go3’oncğonerik; “Çkini şeni K’osovaşi oçinu emsali ren do K’osovaş istisnaşi oğarğalupe mtini var ren” yado ognapu.
Majura k’elen Rusiaş Federa3iaşi Galendulyaşi Nazirobak, Abxazias, Timoşletineri Oxen3alepeşi Artobaşk’elen 12 3’anaşen doni na ixvenen k’omer3ialuri do ek’onomik’uri ambargo diçodinu yado ognapu. 19 3’anağani 1996 tariğis Okorturaşi ok’vanduten na ok’oxteret’es Timoşletineri Oxen3alepeşi Artobaş P’rezident’epeşi K’onseişk’elen gonk’vatineri “Abxazi-Kortupeşi uoxo3’onobaş oçodinu şeni eç’opinu na dvaç’irs tedbirepeşi k’arari”şi toliten, Abxaziaşi ofi3ialuri k’idalape do Abxazias na skidun k’arta k’idaluri do şaxsuri k’oçepe k’ala ek’onomik’uri do so3ialuri k’ont’akt’epe, golvaşi oxoşkvinobaş om3ikanu steri dido mutxanepe imemnuneret’u.
|
TÜRKÇE
