|
P'ROFESORİ ARNOLD ÇİKOBAVA
Lingvist’i do filologi Arnold Çikobava rt’u Okorturaşi Çkinobapeş Ak’ademiaşi mak’idale do ak’ademisionepeşen ar teri do İberiuli-K’avk’asiuri Lingvist’ik’aş Çkinobaluri N3’opulaşiti mak’idale. Okorturaş çkinobaşi xçetomoni maamage Arnold Çikobava rt’u filologiuri p’rofesor dokt’ori. Arnold Çikobava dibadu 14 Mirk’ani 1898 tariğis, Samargaloşi raioni Senak’işi ç’it’a oput’e Saçikobaos. 1922-s oçodinu Tbilisişi Oxen3aluri Universit’et’i. 1926-şen 1933-şakis do3ent’i do 1933-şen 1985-şakisti p’rofesori rt’u am universit’et’işi. 1933-şen 1960-şakis rt’u Tbilisiş Oxen3aluri Universit’et’işi K’avk’asologiaş burmeşi dudmaxvance. 1929-s, ezdu filologiuri çkinobaş dokt’orobaşi derece.
1936- 1985 3’anapeşi şkas, Arnold Çikobava rt’u Okorturaşi Çkinobapeş Ak’ademiaşi Lingvist’ik’aş İnst’it’ut’işi İberiuli-K’avk’asiuri nenapeş burmeşi dudmaxvance (a3’ineri Arnold Çikobavaşi Lingvist’ik’aşi İnst’it’ut’i). 1950- 1952 3’anapeşi şkasti am inst’it’ut’işi direkt’ori rt’u. 1941 3’anaşen geç’k’uten Okorturaşi Çkinobapeş Ak’ademiaşi mak’idalepe do ak’ademisionepeşen ar teri rt’u. 1950- 1963 3’anapeşi şkas, rt’u Okorturaşi Çkinobapeş Ak’ademiaşi P’residiumişi mak’ature.
P’rofesori Arnold Çikobava rt’u; Mosk’vaşi Oxen3aluri Universit’et’işi Lomonosovuri p’rizişi mance (1951), Berliniş Universit’et’işi xçetomoni dokt’ori (1960), Didi Brit’aniaşi Mapaluri Lingvist’uri Cemiet’işi xçetomoni mak’ature (1968), Okorturaşi Oxen3aluri p’rizişi şerefoni mance (1971). Arnold Çikobavak na ixandu sperope aşo rt’u: İberiuli-K’avk’asiuri lingvist’ik’a, lingvist’ik’aşi generaluri p’roblemape, Rustavelogia, Kortuli do K’avk’asiuri nenapeşi grameri, Kortuli nena do ç’aralobaşi ist’oria, Bask’ur-K’avk’asiuri hipot’eza, leksik’ograpia, dç. 300 oçkinobalur- goşogoraluri xvena do 14 monografiaşi maç’arale rt’u. Arnold Çikobava rt’u jurnali “İberiuli-K’avk’asiuri Lingvist’ik’a K’arta3’analuri”şi (a3’ineri İberiuli-K’avk’asiuri Lingvist’ik’a) mak’idale do dudedit’ori.
Arnold Çikobavas Tbilisis 1929 3’anas gamiçkvineri “Ç’anuri T’ekst’ebi/ Xopuri K’ilok’avi” coxoni Lazuri p’aşurapeşi k’oroba k’ala 1936 3’anas Tbilisis gamiçkvineri “Ç’anuri Gramatik’uli Analizi” coxoni Lazurişi gramatik’uli analizepe xveneri noç’arepe kuğut’u. Arnold Çikobavak meçu şuri muşi Ğormotis 5 3’ilva 1985-s, Tbilisis. Let’as niçinu Tbilisiş Oxen3aluri Universit’et’işi steğos.
|
TÜRKÇE
