|
NOSTONERİ OT'RİK'E
Ot’rik’e (Coturnix coturnix) ren kilorişi (Phasianidae) familiaşi irişen ç’it’a k’vinçi. 18- 20 sant’imet’re ginz’enoba uğun. 50- 120 grami monk’anoba uğun. Markvalişi formis mk’ule do mçxu k’ik’iloni, mk’ule msvaloni, mk’ule k’udeloni ağanbargeri ar k’vinçi ren. Dudi muşi ren uçala k’aveşperoni. Dudis ginz’eloni sumi ğara uğun. Tolepe muşişi gomorgva ren xçe xalk’aloni. Xura muşişi jur k’eles ginz’eloni pintixçe do k’aveşperoni ğarape uğun. Am ğarape korbaşi burmes ijvalen. Korbaşi burme ren pintixçe, skit’a-bresti peroni. Kimolişi dudiş tude uğun uçala peroni xalk’a. 3’unas var uğun am xalk’a. 3’unapes uğun dido k’aveşperoba gurp’icis.
İrişen dido dik’a, keri, çvia, papaxişi genomskidepe do balurz’ağişi qonapes obarguten oskedinu k’ai a3’onen. Tasi, munt’uri do bobonç’vaten skidun. Xazirups obğe muşi, tamlonaşi tude na ntxorups k’ut’alas. Skit’a do k’aveşperoni ç’ereloni 7- 15 markvali skups. Namtini orapes, ar 3’anas jur varna sumi faras monç’valoba ikips. Motalepek markvalis gamulunan sum doloni şk’ule. Astaxolo nana muşi k’ala munt’uri do bobonç’va ogoruşa do z’iranşiti oç’k’omuşa geç’k’apan.
Ot’rik’epek, Mariaşina-St’aroşina-Gimuaşi tutapes mendulunan Afrik’aşa. Qinoraşi tutape Afrik’as goloçkumernan. Mirk’ani-İgrik’a-Mbuloraşi tutapes, xolo goiktenan Rusia do Romaniaşi st’epepeşa. Serepes dido tapalaşen na putxunan şeni, perpot iç’opinenan. Xor3i muşi ren dido nostoneri. Ndğaleris qonapes mek’vateri k’orzape, tipişbardepe do tamlonepeşi şkas t’k’obunan. Ti muşişa namitxanik k’aixeşa var nanç’aşakis var yeputxunan.
|
TÜRKÇE
