DUDBUT'K'A

LAZİSTANİŞİ MAĞALDOGURALEPE

Mp’oli do Angaraşi gale na ik’idu Turkiaşi maartani universit’e na ren Uçazoğaşi T’eknik’uri Universit’e (UT’U), 20 Pubrik’a 1955 tariğoni do 6594 nomeroni k’anoniten ik’idinu. UT’U k’ala arxvala T’amt’raşi vardo Ordu, K’erasusi, Gumuşxane, Rizini do Artviniş mağali gurapaşi temeliti geidginu. K’arta noğas universit’e aqvas yado oxanduşi çodinas UT’Uşi Rekt’orobaşa mek’ireli; Art’aşenişi P’rofesiuri Mağalidoguroni k’ala Vi3’eşi P’rofesiuri Mağalidoguroni, 17 Mirk’ani 2006 tariğoni do 5467 nomeroni k’anoniten na ik’idinu Rizinişi Universit’eşa; Arkabişi P’rofesiuri Mağalidoguroni k’ala Xopaşi P’rofesiuri Mağalidoguroni, 29 Pukrik’a 2007 tariğoni do 5662 nomeroni k’anoniten na ik’idinu Artvin Ç’oroxişi Universit’eşa nik’irinu. Mağaligurapaşi Generaluri K’omisiak, 18.04.2008 tariğoni ok’oxtala muşis Rizinişi Universit’eş Rekt’orobaşa mek’ireli Otineşi P’rofesiuri Mağalidoguroniş gedgimu gonk’vatu.

Xopaşi P’rofesiuri Mağalidoguroni: UT’Uşi Rekt’orobaşa mek’ireli ik’idu do 1988-1989 sezonis gurapaşa geç’k’u. 1998-1999 sezonişakis “Ncaş Dulyapeşi P’rograma” k’ala “Ncaş Dulyapeşi Mat’eknik’e“ unvaniten dip’loma na meçapt’u Xopaşi P’MDik, 1999-2000 sezonişen doni “Mobilia do Dek’orasionişi P’rograma” coxoten gurapaşa naqonops do 2000-2001 sezonişen doni “Mobilia do Dek’orasionişi Mat’eknik’e” unvaniten dip’loma meçaps. Na ik’idu ndğaşen doni UT’Uşi K’anunişi kamp’usis na geladgin Xopaşi P’MDik, ağani bina muşi ixazirinaşi gurapa muşişa Xopas naqonasunon.

Vi3’eşi P’rofesiuri Mağalidoguroni: 1998-1999 sezonis UT’Uşi Rekt’orobaşa mek’ireli gurapaşa na geç’k’u Vi3’eşi P’MD, 2005 3’anas ağani do moderni bina muşis kodibargu. Muxasebeşi burmeten gurapaşa na geç’k’u Vi3’eşi P’MDik, ağani na goin3’k’u Maktaloba, T’urizmi do Maot’elobaşi burmepe k’ala mamgurepe muşi monz’inu. Vi3’eşi P’MD, Riziniş Universit’eşi noğaş gale na ren doguronepeşi doloxe irişen mordineri do dobargeri n3’opula ren.

Art’aşenişi P’rofesiuri Mağalidoguroni: 1998 3’anas UT’Uşa na niçinu Art’aşenişi park’e do kerest’eşi fabrik’aş 66 dek’aroni let’aş jin gek’ideri ren. Gamantana-gurapaşa xaziri 10 sinifoni bina do 10 daironi lojmanişi bina koren. Edo xolo xut k’atoni sosialuri tesisi do sum k’atoni oktalaşi bina k’ala çkvadoçkva dep’o do at’elyepeti ren. 3’opxineri na ren K’omp’ut’erişi T’eknologia do Map’rogramoba, T’urizmi do Ot’elişi Maktaloba do Muxasebeşi p’rogramepeşa 2008-2009 sezonis gurapaşa geiç’k’inasunon.

Arkabişi P’rofesiuri Mağalidoguroni: 24.03.2000 tariğis Mağaligurapaşi Generaluri K’omisiaş k’arariten ik’idinu. Arkabişi P’MD, Artvin Ç’oroxişi Universit’e ik’idinuşi UT’Uşen ok’oi3’k’inu. Ar firmaşk’elen doguronişi p’roje do binaşi mo3’ipxu şeni dosiape ixazirinu do otasdik’uşi oraşa komuilinu.

Otineşi P’rofesiuri Mağalidoguroni: 18.04.2008 tariğis Mağaligurapaşi Generaluri K’omisiak, Otines P’rofesiuri Mağalidoguroni ok’idu kogonk’vatu. Rizinişi Universit’eş Rekt’orobaşa mek’ireli gurapa na meçasunon Otineşi P’MDşi doloxe na goin3’k’asunon burmepe şeni goşogorinus niqoninen.