DUDBUT'K'A

OP'ONENT'İ JURNALİ "MARKOPAŞA"

Markopaşa rt’u mağali t’irajoni op’onent’i iumorist’uli jurnali namuk na geç’k’u gamoçkvinus 1946-s. Coxo muşi ezdipt’u Marko Apostolidis coxoni Urumi Ortodoksi ar Osmanuri hekimişen. Marko Paşaşi ambari aşo rt’u: Ç’it’a Markok oçodinu geç’k’apuroni do oşkenduri doguroni Sirosişi k’un3’ulas. Ok’ule, muşi ocaği k’ala artot Mp’olişa idu. Malimuri Medi3inaşi N3’opula oçodinu. K’ai ar hekimi na rt’u şeni, mk’ule oraş doloxe içinu. Paşobaşi rutbe na niçinu maartani hekimi iqu. 1861 3’anas, Padişahi Abdulazizişi hekimbaşi i3xunu. 1871-s, Malimuri Medi3inaş N3’opulaşi naziri i3xunu. 1878 3’anasti iqu mak’ature senat’işa. Mç’itatutaşi ok’iduşa mxuci meçu. Marko Paşa dido ç’ibroni ar hekimi na rt’u şeni, nusimint’u muşi zabunepes ginz’e orapeş morgvalis. Mutepeşi derdepes gza gorupt’u. Majura k’ele, entepeşa meçapt’u şurieri mo3’qvineroba do raxat’oba. Am xasieti muşi ignu xalk’işi şkas. Derdi na uğun mitxanişa “skani derdi Marko Paşas oxo3’onapi” yado ar tkvala kogamaxtu. Xalk’işi derdepes na nusimint’u Marko Paşaşi xasieti, am sebebiten, xalk’işi derdepe, gurişozdupe na oxo3’onapasen do entepeşa gza na o3’irasen Markopaşa coxoni jurnalişi coxo iqu.

Markopaşak geç’k’u gamoçkvinus, 1946-s. İsmet İnonuşi diktat’orobas na nodgitut’u irişen beciti op’onent’i ar ç’k’oni rt’u. P’olit’ik’uri ar iumorist’uli jurnali rt’u. (CHP) Resp’ublik’aşi Xalk’uri P’art’iaşi p’olit’ik’ape k’ala k’abğa uğut’u, namuk na nonç’inapt’u dobadona Amerik’aşi Ok’ont’aleri Oxen3alepeşa. Xalk’işi umuteloba do uimendobaşa gamatkumert’u, moşletinobaşi gzape o3’irapt’u. Mtel antepe ikipt’u ugegaperi st’ili do nenaten. Organizapt’u xalk’uri op’ozi3ia uoçkineri. Sabahattin Ali, Aziz Nesin, Rifat İlgaz, Mustafa Mim Uykusuz rt’es Markopaşaşi maç’arale, namuk na gamiçkvinet’u P’arask’epes. Sabahattin Ali rt’u Markopaşaşi dudmaç’arale, Mustafa Mim Uykusuziti rt’u muşi k’arik’at’urist’i. Op’onent’i ar minoba na uğut’u Markopaşas, ar k’ele Amerik’aşi Ok’ont’aleri Oxen3alepeşa k’udeli na rt’u CHP k’ala, majura k’eleti CHP şi k’udeli na rt’u burok’rat’epek mxuci na meçapt’u mauçabazare do limaşxampape k’ala k’abğa uğut’u.

Muşi op’onent’i xalişi sebebiten, faşist’i CHP şi xe3alaşi maxkemepek gon3’k’es çkvadoçkva davape Markopaşaşi namusoni maç’aralepeşa. Jurnalişi namtini nomerapes xe geidvinu. Namtini orapesti jurnali geink’ilu. CHP şi xe3alaşi am faşist’uri oğodapeşi sebebiten, Markopaşaşi kunyes uğut’u aşo tkvalape: “Xe na var geidvinu orapes gamulun”, “Muşi maç’aralepe moloxuneri var t’anşi gamulun.” Markopaşa geink’iluşi, “Merhumpaşa” (“Ğurelipaşa”), “Malumpaşa” (“Na içkinen paşa”), “Yedi-Sekiz Hasanpaşa” (“Şkvit-Ovro Hasanpaşa”), “Hur Marko Paşa” (“Timoşletineri Markopaşa”), “Bizim Paşa”, (“Çkini Paşa”) “Ali Baba” steri coxopeten gamiçkvinu. Markopaşaşi ti gondinu şeni, CHP şi faşist’i xe3alak var ixmaru huk’uk’i xvalot, ixmaru çkvadoçkva oinepeti, jurnalişi ek’onomiuri menceliti osap’aru şeni. Murenki jurnalişi maç’aralepek var ç’ares st’at’iape xvalot, mara xes dokaçeri gamaçes jurnalepe kuçapes. Em orapes, dğaluri gazetapeşi t’irajepe rt’es m3ika 50.000-şen. Murenki Markopaşaşi t’iraji rt’u 60- 70.000.

Andğaneri ndğas, Markopaşa itkvaşi, iumorist’uli ar jurnali oqopinot içkinen do içinapen xvalot. Murenki Markopaşa rt’u beciti ar xali, CHP şi faşist’i xe3alaşa na nodgitut’u. Markopaşaşi am xali iqveret’u beciti fakt’orepeşen arteri, namupek na meçes gza Demok’rat’i P’art’iaşa xe3ala oqopimu şeni, na rt’u op’onent’i em 3’anapeş morgvalis.



                                                                                                                                                              TÜRKÇE