DUDBUT'K'A

AR FİLMİ: AVT'OBUSİŞİ MAGZALEPE

1960-oni 3’anapeşi moç’k’as yeşiğeri, xalk’uri temaloni nak’otxani filmepeşen ar teri ren “Avt’obusişi Magzalepe”. “Avt’obusişi Magzalepe”k oxo3’onapaps ar k’ele ar qoropaşi ambari majura k’eleti umuteli xalk’i na moğerdinaps dixaşi mafiaş dubaracobape. Kemali ren İ.E.T.T.-ş avt’obusişi şoferi. K’arta ndğas, artneri oxtimoxtimobas niqonups xalk’i ar sotxanişen majuranişa. Xususurotti ç’umanepes, iptineri dodginaleşen na gexedun magzalepe k’ala xolosoni megabre iqveren Kemali. Artneri kuçaşi xalk’i steri renan. Ar ndğas, ar k’ulani gexedun avt’obusişa. Coxo muşi Nevini na ren, na oxovo3’onaminonan am k’ulani na z’irops Kemalik aqoropen ar menda3’k’omiluten. Nevini var oxo3’onaps xali. Oxtimu-moxtimuten Nevinik içinops magzalepe, magzalepekti Nevini. Tabi Kemalikti içinops Nevini, Nevinikti Kemali. Kemali o3’k’en Nevinis arçkva toliten mara 3’oxle Nevinik var oxo3’onaps aya. Kemali ren int’elekt’ualuri ar şoferi; ik’itxups. Direk3ionişi p’anzot’is, iroras koren ar-jur gazeta do emoras na ik’itxups ar svara. Ok’itxu na qorops, hak’k’epe muşi na uçkin do entepes na numxvacups, menceli dork’inerepes na nuşvels, 3’ori ar ağanmordale ren Kemali. Badi-xçinepeşi skiri ren do malamturepeşiti megabre. Nevinişiti qoropeli. Ar ndğas, Kemalik na goçumers avt’obusi ok’uixven gverdi gzas. Kemali tude gextimuten k’ap’ort’a gon3’k’ips, mu ağodu yado oxo3’onu şeni goşon3’k’en. Emoras Neviniti gextimuten Kemalişk’ele ulun. Aya na z’irops Kemalik naşkumers avt’obusişi mot’ori k’ala obodu do na aqu am fursat’i oxmaruten, Nevinis u3’umers eya na qorops. Nevinis gaqviren. Mutxanepe tkvasunt’uşi İ.E.T.T-ş tamirişi avt’obusi komulun. Aya na z’irops Nevinik k’ap’ineri avt’obusişa yulun do sva muşis kodoxedun. Avt’obusi gzas gedgitun.

Na mek’ilu oraş doloxe, Kemali do Nevini ok’oiqoropenan. Kemalik oxo3’onapaps lavoni muşi, na skidupe, na skidun barak’a, muşi manz’agerepe, na idu n3’opula, k’arta ondi Nevinis. Murenki Nevinik mutu var oxo3’onapaps ti muşişen, udodginu imt’en oxo3’onapuşen muşişi ambarepe. Ar mjaçxaşi ndğas, Kemali do Nevini ok’oik’atenan Beyoğlus. 3’oxle, ar mamuxallebes, imxornan tito muxallebi. Ok’ule ulunan ar k’inoteat’rişa. Kemali do Nevinik filmis vardo artikartis o3’k’ernan udodginu. Kemalik okaçaps Nevinişi xe. Ogzaluten Karakoyişa mulunan. K’aravişa gexunuten ulunan Uskudarişa. Ok’uleti ulunan Çamlicaşi rak’anişa. Ar çaiş baxçes doxedunan. Arçkva uçkinan, na ok’oiqoropenan. Qoropeli iqvenan.

Nevinik dido ar xampa k’oçişi k’ulani na ren, zop’ons Kemalis. Kemalik ixelen Nevini mi na ren, na oxo3’oni şeni, murenki muk xanç’aluri maamage na ren şeni, k’ai var a3’onen xampape. Aya u3’umers Nevinis. Nevinikti zop’ons, emusti na var mo3’ondun xampape do xampa baba muşişi leboni dulyape. Kemali iraxat’en. Murenki oxvenuşi mutu var ren. Kemali do Nevini ok’oiqoropenan. Beciti na renti, aya ren. Nevini tkveren, baba muşi xampa na rt’u mara, mi na rt’u var tkveren. Aşopeten tutape golulun.

Ar ç’umanis, avt’obusişa na gexedun ar badi do xçinik moviğerdinit ya zop’onan. 3’anapeşen doni, taksit’epe orape mutepeşis meçes tina, xoloti k’oop’erat’ivişi oxorepe na var aqves, emuş met’i ar oxori arişen met’i k’oçis na gamiçinuti oxovo3’onit ya tkumernan. Entepes aya na oğodu firmaşi coxo meçapan. Am firmaşi coxo na ognes magzalepeşen namtinepekti am firmas geç’areli na meçes do entepeti moğordineri na rt’es tkumernan. Avt’obusişi şoferi Kemalik astaxolo oktiraps avt’obusişi oxtimoxtimoba do firmaşa oxtimu şeni gzas gedgitun. Nevini imç’itanen. Oxosarobaşi yalişen, Neviniş nunk’u gemç’itaneri na z’irops Kemalik k’itxups, mu gağodu yado. Nevini dostibun. Arm3ika ora şk’uleti omgarinus kogeç’k’aps. Am oraş doloxe, avt’obusik dodginalepes na var dodgitu şeni, avt’obusi na çumers namtini magzalepek t’ilifoniten ambari meçapan İ.E.T.T.-şi şkaguronis. Avt’obusi, firmaşi mskva binaş 3’oxle na dodginaps Kemalik mağdurepe k’ala artot binaşa amulut’aşi, İ.E.T.T.-şi çavuşikti mulun elak’ateri arçkva şoferi k’ala. Avt’obusi şkaguronuri garajişa mendimers. Kemalik var z’irops aya. Emuk em oras mağdurepe k’ala artot firmaşi timçxupe k’ala ğarpalaps. Em oras odaşa na amulun ar k’oçik Nevini mağdurepeş doloxe z’iraşi, “Kale k’ulani çkimi, si mu dulya giğun antepeşi doloxe” yado nok’itxups. Dulya koxoi3’onen. Nevini, umuteli xalk’i na moğerdinu firmaşi mance na ren mgvaneri do vamskva k’oçişi k’ulani ren.

Nevini a3’i meç’ireli ar xalis ren. Ar k’ele baba muşi majura k’ele qoropeli muşi Kemali. Ar k’eles Kemalik na skidun ar odaloni barak’a ekole k’ele ar koşki, xezmetkarepe, uşağepe, aşçepe. Qoropak geocginaps. Mara ar derdi koren: Kemali avt’obusişi oxtimoxtimoba na goktiru do uk’itxeri xalk’işi ti-ezdobas na go3’oncğonu şeni dulya muşişen geit’k’oçinen. Aşopeten Kemali iqven, zeri xalk’işi go3’oncğoneri. Nevini skidun Kemalişi ar odaloni, 3’k’ari do elekt’rik’a na var uğun, çeçme muşiti gale na ren, barak’as. Emus gari uxazirs, dolokunepe unaxups. Kemali oxorişa moxtaşi, oç’k’omu şk’ule, na ik’itxes svarapeşen ok’oğarğalnan.

Rejisori: Ertem Goreç; P’roduseri: Nusret İkbal; Oz’iramuşi rejisori: Turgut Oren; Senario: Vedat Turkali; Musik’a: Yalçin Tura; Masağalepe: Ayhan İşik, Turkan Şoray, Salih Tozan, Suna Pekuysal, Selahattin Yazgan, Ahmet Tarik Tekçe, Senih Orkan, Avni Dilligil, Reha Yurdakul, Suphi Kaner, Atif Kaptan, Diclehan Baban, Giray Alpan, Renan Fosforoğlu, Riza Tuzun; Ginz’enoba muşi: 99 deik’e; Xvenaş 3’ana: 1961; Dobadona muşi: Turkia; Nena muşi: Turkuli.