|
P'ARAZİT'İ ĞANÇ'K'A
Ğanç’k’a (İxodoidea) ren mem3xveri t’rik’oni bombulanari (Arachnida) k’lasişen. Aya ren galeni p’arazit’i, di3xirimşumu do utole. Şuronepeşi t’k’ebis naç’aben do di3xiri 3’u3’onups. Ar seksoni ren. Markvaliten imralen. 3’unak naşkumers muşi markvalepe opintoba do skindinapeş puzurepeşi şkas. Met’amorfozuri rdala uğun emus. Sumi t’rik’oni larva gamulun markvalişen. Pupaluri ar p’eriodi şk’ule nitken 8 t’rik’oni nimfa. Nimfakti pupaluri p’eriodi şk’ule iqven ağanmordale. Larva do nimfak didopeten txalarepeşi jin; ağanmordalekti k’oçi, mçxuri, puci, coğori steri buz’ilonepeşi jin skidun p’arazit’ot.
Dudi k’ala ok’omç’k’eşeri ar uba t’urva formoni 3’unak 11- 12 mm-şakis ibaren. Ağanmordales uğun otxo t’rik’i. T’rik’epeşi k’un3’ulis çengeli do vant’uzepe iz’iren. Perpot t’k’ebis naç’aben do hort’umiten 3’u3’onups di3xiri. K’aixeşa ibaraşi, ti-muşi naşkumers svaşa, melaps do tipi varna ncapeşa yulun. 3’oxleni k’uçxepeşi k’un3’uli uğun dido moxva men3’u do meşuruşa. Mt’k’as, gexederi ncaş tude skindina golulut’aşi me3xont’un, t’k’ebi muşis naç’aben do xor3is hort’umi me3onuten am şuronişi di3xiri 3’u3’onups. İptineri jur t’rik’i muşi 3’oxleş k’ele, çodina jur t’rik’iti k’ap’ulaş k’ele uğun. Andğaneri ndğas, 889 sort’i uğun yado içkinen. Murenki; mtel ğanç’k’ape var ren zararoni, p’arazit’i do utole. Puci do coğoris na naçkinenanpe toloni renan. K’oçi do oxoruli skindinapeşi jin p’arazit’ot na skidunanpek nuk’limapan çkvadoçkva mik’robepe. Zararoni renan do çkvadoçkva bakt’eriape omralapan.
Di3xiri na 3’u3’onups ğanç’k’aşen moşletinu şeni, t’k’ebişen me3’k’u do met’k’oçuk monz’inaps zabunobaş nak’limuşi risk’i. Mestik’uşi gza na igoren ğanç’k’ak, korbas na uğun mik’robi do bakt’eriapeten yepşeri di3xiriş mteli komoçodups. Gulva Avrop’as xveneri ren ar p’enset’i, ğanç’k’a t’k’ebişen uzararot me3’k’u şeni. Murenki am alet’i var içkinen Turkias. Ğanç’k’aten na nak’limen zabunobape dido iz’iren Amerik’as. Ğanç’k’a t’k’ebişen perpot me3’k’imus na nirgen muşiuri ar k’izi xveneri ren. Am k’izişi şvelaten, xari do mem3xverepes meç’aberi ğanç’k’ape perpot koni3’k’inen.
|
TÜRKÇE
