DUDBUT'K'A

OMJOREGULVA K'AVK'ASİAŞİ RESP'UBLİK'A

16.- 19. oş3’anurapes Osmanuri oxen3aleş maktalobas na rt’u Omjoregulva K’avk’asia, K’arsi, Art’aani, Batumi, Axisk’a, Axilkelekişi gulva, Eçmiadzini do omjoregulva muşi, Yerevanişi omjore, Naxçivani, K’ağizmani do Oltuşi k’ortapes xe modumert’u. Omjoregulva K’avk’asiaşi Resp’ublik’a (Cenubi Garbi Kafkas Hukumeti Cumhuriyesi), Mondrosişi akt’iş k’ule Yulva Anatolias na geidgineret’u lok’aluri xe3ala rt’u. Kianuri maartani limaş çodinas imza na geidvinu Mondrosişi akt’ik, Osmanuri armia Omjore K’avk’asiaşen gamoçkumert’u. Osmanuri Oxen3alek am hukmiten, muşi askerepe k’ortas kogoşibğeret’estina uk’uniktinu dvaç’ireret’u. Sumi vilayet’i na itkven K’arsi, Batumi do Art’aani, Armenepeşi işgalişa gon3’k’imeri nikteret’u. Emuşeni sumi vilayet’işi timçxupek, 5 3’ilva 1918 tariğis 3’oxle K’arsişi İslamuri K’omit’e coxoten iorganizes. 14 3’ilvas na ixvenu k’ongres Na3ionaluri İslamuri K’omit’eşi Generaluri Şkaguri coxo gedveri ağani xe3ala i3’opxinu.

K’omit’ek, 17 3’anağani 1919 tariğis Omjoregulva K’avk’asiaşi Na3ionaluri Muvak’ati Xe3ala do3’opxu. Am muvak’ati xe3alak gendğanis, 18 maddoni dudk’anoni do xçe-jvari perepeş jin tuta-muru3xi na gez’it’u bandara kogamaçkinu. Nananoğa muşi K’arsi na rt’u oxen3aleşi reisicumxuroba, Cihangirzade İbrahim Aydin Begis niçinu. Na i3’opxinu meclisi, 1 Mirk’ani 1919-s oxandus kogeç’k’u. Omjoregulva K’avk’asiaşi Na3ionaluri Muvak’ati Xe3ala 25 Mirk’ani 1919-s, Omjoregulva K’avk’asiaşi Resp’ublik’aşa koniktu. Xe3alak, Turkiaş dixapeşi jin demok’rat’ik’uri p’arlament’uri xe3alaş sist’emaşi maartani misali 3’opxupt’u. Maartanot, “Dudk’anoni”, “Dobadonamşine”, “Demok’rasi”, “Cumxuriyet’i”, “Reisicumxuri” steri t’erminepe molişinet’u. K’ortas na dgit’es İnglizepek, lok’aluri xe3alaşi oxanduşa ç’it’a oras nena var eşiğes. Mara 13 İgrik’a 1919-s K’arsis xe kogedves do xe3ala komoktes. Xe3alaşi 12 mak’ature koç’opes do 3’oxle Batumişa do ok’uleti Maltaşa uçves. İnglizepeşk’elen Armenepeşa meşkvineri K’arsi, 1920 3’anaşi yebargoras Kazim Karabekiriş k’umandanobaşi askerepek k’ortas xe gedvesşakis ardogverdi 3’ana işgalineri rt’u.



                                                                                                                                                              TÜRKÇE