DUDBUT'K'A

AR FİLMİ: EDGİTA

1800-oni 3’anapeşi oşkenda. Ser Villiam Valkeri ren Brit’anurepe şeni na ixandeps ar agent’i p’rovak’at’ori. Lima na gamaçaps ar k’oçi ren. Dobadona muşi do dulya muşi dido qorops. K’araibepes k’un3’uli Queimadaşa mendiçkvinen. Queimada ren P’ort’ugalişi k’olonia. Ser Villiam Valkerişi misia ren uça kolepe yedgitinu do P’ort’ugalurepeşi xe3ala gektinu. Brit’anurepes unonan xe gedvu k’un3’ulişi ek’onomias, k’un3’uli ren beciti şekerişp’inç’o na omralaps şkaguroni do emuşeni. Noğira ren xe3ala P’ort’ugalurepeşen eç’opu do Brit’aniaşa mek’ireli xçe dixaşmancepeşa meçamu. Am p’roekt’i oxor3elu şeni, Ser Villiam Valkerik gza gorups, uça kolepes ocerapu, kolobaşen oxoşkvinu do k’un3’ulişi timoşletinu şeni.

Ser Villiam Valkerik on3’opulaps, k’un3’ulis na ok’ouçinu limanişmadulye Xose Doloresis tiezduşi magektaluri simadape. Brit’aniaşi armiak, Ser Villiam Valkerişi xeten tiezderepes na meçu gamantana, silaxi do P’ort’ugalurepeşi çkinapa k’ala tiezdoba geç’k’aps. Ser Villiam Valkerik na on3’opu Xose Doloresi iqven edgitaşi go3’oncğoneri. Murenki Xose Doloresis var uçkin Ser Villiam Valkeri mi ren do miepe şeni ixandeps do çkar mututi var aguren. Uça kolepek yedgitunan. K’un3’ulişi P’ort’ugaluri oktaloba geikten. Ok’uleti ik’iden ar kuklauri oktaloba Brit’aniaşa mek’ireli. Edgitaşi go3’oncğoneri Xose Doloresi iqven P’rezident’i. Misia muşi na oçodinu Ser Villiam Valkerik gamulun k’un3’ulişen. Uça kolepe va renan kolepe mara, şekerişp’inç’oşi qonapes dido xavi k’alserepes oxandu xolo entepeşi dulya ren. Entepes uğunan ğormotonobape teorias, mara m3xades k’alserepe renan umosi p’at’i entepe şeni. Kole rt’esşi, artikartis zenciri gedveri xalis, artneri angişen na imxort’es do artneri vedroşen na şupt’es, artikartişa cuma na rt’es uça kolepe “oxoşkveri” iqvesşi, artikartişa mt’eri niktenan, a3’i zencirepe var uğunan mara umosi mogu şeni, mt’eruli rek’abeti uğunan doloxe mutepeşis do emuşeni.

3’anape mek’ulun. Ser Villiam Valkeri xolo mulun k’un3’ulişa. Am faras, misia muşi ren gondinu uçaluri p’olit’ik’uri k’ank’ala, namuşi tasi emuk na meçu, golaxtimeri oras. Ser Villiam Valkeri var ixandeps a3’i Brit’aniaşi xe3alaşa mara, ti muşi armia na 3’opxups do k’un3’ulişi p’olit’ik’uri skidala p’icdop’icişen oktalu na unon "K’omp’ania Royal Şekeri” şeni ixandeps. A3’i otxo xasieti koren. Dulya muşi dido na qorops do k’arta oras gecgineri ar agent’i p’rovak’at’ori. Mcveşi kole, k’un3’ulişi a3’ineri P’rezident’i. Ağani xalk’uri go3’oncğonerepe. Edo zencironi varna uzencironi mşkironeri do t’et’eli xalk’i. Mik mi şeni oktalasunon Queimada? Aya ren mtel mesele. Filmi aşo naqonops.

Maktale: Gillo Pontecorvo; Maxvenale: Alberto Grimaldi; Senario: Franco Solinas do Giorgio Arlorio; Musik’a: Ennio Morricone; Sinemat’ografia Marcello Gatti; Masağalepe: Marlon Brando, Evaristo Marquez, Norman Hill, Renato Salvatori, Dana Ghia, Valeria Ferran Vanani, Giampiero Albertini, Carlo Palmucci, Thomas Lyons, Joseph P. Persaud, Alvaro Medrano, Alejandro Obregon, Enrico Cesaretti; K’omp’ania: United Artists; 3’ana muşi: 1969; Ginz’enoba muşi: 112 3’uti.



                                                                                                                                                              TÜRKÇE