|
MİSİRİŞİ ÇARÇİ
Misirişi çarçi a3’i na geladgin svas, Bizant’iuri p’eriodis “Makron Emvolos” coxoni motvaleri ar çarçi geladgit’eren. Am raionisti Ebraelepek xert’erenan. Çarçişi ok’idoba kogeç’k’uşi, Ebraelepek kodibargerenan raioni Balatis. Misirişi çarçi ren Mp’olişi majurani motvaleri çarçi. Yeni camişi (“Ağani meçeti”) k’omp’leksot ixveneren. Ok’idoba muşis geiç’k’ineren Sult’ani masumani Muratişi çili do Sult’ani masumani Mehmedişi nana Safiye Sult’anişi geçinadvuten 1597-s. Oxvenoba muşi 60 3’ana na naqonu Yeni camişi temelis kva geşidvinu mimari Davut ağaşk’elen. Dudmimari, Dalgiç Ahmet Çavuşik naqonu ok’idobas do dudmimari Mustafa Ağaşk’elenti içodinu. Ak ik’ideren ağani meçeturi k’omp’leksi do Misirişi çarçi diçodineren 1664-s. Moç’k’as “Valideşi çarçi” varna “Ağani çarçi” yado coxo geidvineren çarçis. Mara didopeten Misirişen (“Egvipt’ia”) moğeri malepe na gamiçinet’u ar sva na rt’u şeni, 18. oş3’anuraşi şkaşen doni Misirişi çarçi coxoten şigneri ren.
Em oraşen doni, çarçi do muşi gomorgvas namtini oktirobape iz’iret’utina, Misirişi çarçi iptineri muşiurobapeten andğaneri ndğaşa moxtimeri ren. 24 saat’iş morgvalis na naqonu 1691 3’anaşi oç’vaş k’ule 1940-epes yeçkindu jur didi oç’vaten çarçis aqu dido zarari do ziani. Mcveşi oz’iramu muşi gondunu mtelot. A3’ineri forma muşi yeçkindu 1943 3’anaş xveneri rest’ora3iaş k’ule. K’ubbe muşi, Motvaleri çarçişi k’ubbeşen umosi mağali ren. Misirişi çarçiş p’lani ren “L”-şi formas. Emus uğun anşi nek’na. Mara namtinepe var ixmarinen andğas. Çarçişi oxvenus xmareri ren k’vateri kva, tuğula do molozişi kva. Misirişi çarçi ren xveneri arastaşi formas. Çarçişi amaxtimonepes ok’o3’k’en motvaleri kuças simet’riuri do n3’uraneri hucrepek. Ginz’e xanç’alis, ok’o3’k’eri 23-ten 46, mk’ule xanç’alis 18-ten 36 eyvani do dukkani, emuş met’a jur xanç’aliş ok’ok’atuşi burmes 6 eyvani do dukkani k’ala arto, çarçis uğun 88 dukkani. Gale na geladgin 17 dukkani k’ala artot dukkanişi nak’onoba ren 105. Jur xanç’alişi ok’ok’atuş burmeşi oşkendasti geladgin çarçişi xvamaşi meydani. Ak go3’ok’ideri ar ezanişi sva ixveneren. 1970-epeşen doni aktarepeşi dukkanepe iç’it’anuşi, entepeşi svas mak’uyume, k’asap’i, xomulamaxile, mamanifat’ure, mak’uçxeşmodvaleşi dukkanepe koguin3’k’eren.
|
TÜRKÇE
