|
ĞECİK NANK'AP'U DO T'URA ĞURUT'U
Vi3’eşi ar oput’es ğecik na nank’ap’u ar oput’ari k’oçi ocaxi muşik muşletinu. Oput’e muşiş na skidun oxorişa 250 met’ro k’onari mendra na ren qonas xvala ixandept’uşi ar ğecik k’oçis nank’ap’u. Ğecik k’oçi k’ala ok’ok’vak’idu do k’oçisi k’uçxe do şkas dido p’at’i geçu do gyak’ibinu. K’oçik tude melapt’uşi oqurus kogyoç’k’u. K’oçişi oquru na şignes çili do berepe muşi muşletinu şeni unk’apes.
Ğecik oquru do o3’iruşen doşkurdu do astaxolo omt’inuşi gza goru. Na nuç’işes bere do barik k’oçi tude ok’onağureli do di3xironi xalis z’ires. K’oçi eşo perişani xalis z’iresşi, çili do berepe muşi omgarinus kogyoç’k’es. Entepeşi omgarinu do oquruşi xonari na şignes manz’agerepekti, astaxolo qonaşa komoxtes. Na moxtespeşi dolexe ar p’elivanik, koçi k’ap’ula muşis moik’idu do ar şvacis ar k’ilomet’ro ekole na ren manganaşi gzaşa geliqonu. Ok’onağureli na ren do di3xiri na dvaben k’oçi muşletinu do ok’aru şeni Vi3’eşi Devleturi Oxzabuneşa nuç’işines. K’oçi manganaşen geiqones do manişa-manişa sedyeten aciluri servi3iaşa kodoncires. Ekimepe do hemşirepek op’era3ia oxvenu şeni k’oçi ameliyatxanaşa amiqones.
Dido meç’irelu ar op’era3ia golaxtu do 6 saat’i doloxe rt’es. Op’era3ia na qu ekimepek; “ Çkin amus 3’oxle am raionis aşo ar mutxani varti şigneri do varti z’ireli vort’it. K’oçi oxzabune çkinişa ora muşis moqoneri vart’uk’onna, k’oçişi muşletinuşi albatoba var maqvet’es.” ya tkves. Xadise na şignes zoologepek; “ Ğecepek generalurot k’oçepe na skidunan svalepeşa var gyulunan mara 3’anaşi am orapes mşkironeri na doskidunan namtini mt’k’uri ğecepek oç’k’omale ogoru şeni, oput’epeşa gextimu ç’irnan. Namtini orapes namtini mt’k’uri ğecepek p’artneri ogoru şeniti oput’epeşa gyulunan.” ya tkves.
15 nğaşk’ule oxzabuneşen na gamaxtu zavali k’oçik; “ Em dğas qonas xvala vixandept’i. Çili do berepe çkimi na vort’i svaşen 250-300 met’ro ekole na miğun oxoris rt’es. Edo solen na gamaxtu var na oxoma3’onu ar ğecik çkimda memat’u do kogemoktu. Ma tude emu k’ala k’abği p’i mara emuk çkimden menceloni na t’u şeni xura çkimis dido zarari momçu. Egere ma var momişletinestuk’onna, a3’i ğureli vort’amint’u. Çkimda mxuci na momçu irixolos dido şukuri vu3’umer” ya tku.
|
TÜRKÇE
