DUDBUT'K'A

ABXAZİAŞİ RESP'UBLİK'A

Abxaziaşi Resp’ublik’a (Apsny Ahvyntkarra), Olandegulva K’avk’asias, Uçazoğaşi olandeşk’eleni zoğap’icis 8.700 km² dixaşzomoni do nananoğa muşi Suxum na ren timoşletineri oxen3ale ren. Gulvaşk’ele ğali Psovi, yulvaşk’ele ğali İnguri k’ala na niçoden dobadonaşi yulvas Okortura, gulvas K’rasnodari, olandes K’araçay-Ç’erk’ezişi Avt’onomiuri Resp’ublik’a, omjores 214 k’m zoğap’iconi Uçazoğa ren. Nak’onoba 340.000 adami na uğun dobadonaşi noğape ren; Suxum, Gagra, Gal, Gudauta, Gulripş, Oçamçira do Tkuarçal. Abxazepe k’ala Sumexepe, Rusepe, Urumepe, Turkepe, Margalepe do Uk’raynepes oxormancoba na ikips Abxaziaşi Resp’ublik’as, xalk’epe do k’ult’urapeş oskedinuşi xususoba uğun.

Abxaziaşi dixapeş nanç’inerot %75 k’onari germapek 3’opxups. Adamepek didopete zoğap’icepes, zenepes do tapala k’elepes dobargeri renan. Olandeşk’ele Abxazias mok’udgin K’avk’asiaşi didi germape. Germapeşi mağaloba didopete ren 4.000 m k’onari. Generalurot t’aroni uğun çuçuna. Mogapaşi odudepe uğun skindinoba, maçxomoba, maxiloba, mamt’k’aloba do t’urizmi. Tkuarçalis kianaşi irişen k’ai noşkeri gamiğinen. İst’orias met’aksişi gzaş zoğaşa na guin3’k’en nek’na na rt’u Abxazias, noşkerişi xampa havzape do mermerişi ğirsoni rezervepe uğun. Edo xolo dobadonas; okro, varçxili, k’urşumi, rk’ina, manganezi, nik’eli, t’angi, civa, çink’o, kukurdi, cumu, şapi, amiant’i, lit’ografi steri madenepe iz’iren. Ğalepe muşişenti elekt’rik’işi energia moiginen. Dido xampa madenişi 3’k’arepe do abanope uğun. Zoğap’icis çai, tutumi, zeytini, port’ak’ali, limoni, ok’alipt’usi, ak’asia, manolia, ç’k’oni, p’almie orguşi do oskedinuşi dido k’ai t’aroni uğun.

Abxazias uğun irxolo Abxazurot na igurinen, otxo 3’anas na naqonen Abxazuri geç’k’apuroni doguronepe. Emuşk’ule oşkenduri doguronepes do Suxumişi Universit’es Abxazuri nena do ç’aralobaşi dersepe Abxazuri nenaten niçinen. Abxazurot na ixandeps t’ek’nik’uri goşogoraşi k’omisionepe do doguronepe, k’onservat’uari, tiat’ro, oxen3aluri mat’baa do oxen3aluri gamamçkumalepe ren. Suxum do Bamboras havaşdixape, Suxum, Oçamçira do Pi3undas limanepe na uğun Abxaziaşi Resp’ublik’as, 1831 k’m dixaşgza do 192 k’m rk’inaşgza uğun.



                                                                                                                                                              TÜRKÇE