|
GALURİ MARGALEPE
Galişi raioni, andğas Abxaziaşi Resp’ublik’aş sinorepeş doloxe doskidineri, nananoğa Soxumişa 83 k’ilomet’re mendranoba na uğun, Margalona k’ala manz’ageri dobargale ren. Abxaziaşi p’roblemoni raionis, Kortupeşi asimilasionişa go3’oş3’anuras Abxazepe k’onari medgineri do çkvaneri nena do cinconi Margalepe skidunan. Galişi raioni, 1994 3’anaşi Mosk’ovaş mut’arek’ete Rusiaşi mo3’qvaş askerepe na dibarges t’amp’oni dixaş irişen k’rit’ik’i raioni ren.
1992- 1993 3’anapeş Abxazi do Kortupeşi limas “T’ruvaşi 3xeni” misia na uğut’u Galişi raionişen na içvinu Margalepeşi namtinepe kuk’uniktu. Mara 1998 3’anaşi ok’ok’idinuş k’ule namtini Margalepes xolo oxori mutepeşi naşkvinu kodvaç’ires. Margalepek ti mutepeşi, ağani lima eçkindaşi Okorturaşa na itxozinasunon etnik’uri grup’i na şinapan şeni Kortuli faşizmak noç’irapapas tina xoloti Soxumişa vardo Tbilisişa ixolosenan. Okorturaşi Margalepes na var uğunan nananena oskedinuşi hak’i Galuri Margalepes kuğunan. Gamantanaşi temeluri nena Rusuli na ren doguronepes Kortuli k’ala Margaluri nenati igurinen. Doguronepeşi gverdisti na unonanpeşa Abxazuri nena igurinen. Edo xolo Abxazuri oktalak “Gali” coxoni Rusuli-Abxazuri-Margaluri gazeta gamoçkumers. 1995 3’anaşen doni na gamiçkvinen gazetas 1.000 t’iraji uğun do upareli ren.
Gazeta Galişi redakt’ori Nugzar Salagayevik noğira mutepeşi aşo ognapaps: “3’oxle mpuleri noğira miğunan ya açkines mara ok’ule k’ai guroni na voret koxo3’ones do a3’i çkini gamaçkvala çumernan. Didopete Kortuli alboni k’ala Margaluri p’ç’arupt’it. Mara a3’i Margaluri alboniti vixmart. Muşendo, Okorturas Margaluri var igurinu, irxolos kogoç’k’ondu. Mara gazetak xalk’işi didi nç’ela ko3’irapu. Okorturas Margaluri gazeta va ren. Go3’os “Dobadona” coxoni oxoşkveri gazeta ar k’oro3xale gamiğinu mara umosi izni var niçinu. Çkini gazeta Okorturasti onç’eleri ik’itxinen. Okorturas Margali oqopinu do Margaluri oğarğalu dido p’at’i işinu. Margaloba doloxeni dolokunu steri ren. Adamepek oxori mutepeşis Margaluri ğarğalapan mara gale gamaxtanşi Kortuli porça dolikunapan. P’rest’ijoni Kortuli nenate ğarğalapan. Çodinaşi 100 3’anas çkinti dido m3’irit. Emuşeni asimilasioni oğoderi Margalepeşi k’ult’uruli renoba oskedinu minonan”. Soxumis geç’k’ineri Margaluri radioş oç’andinus Galişen niqoninasunon. Soxumişi oktalak Margaluri t’eleviziaş oç’andinu şeniti ixaziren. Margaluri oç’andinu, Margaluri nena memnuneri Margalonaşenti iz’irinasunon do isiminasunon.
|
TÜRKÇE
