|
ON3'İRONİ PUKİRİŞ ZABUNOBA
Pukiriş zabunoba (Variola), k’arta 3’aneris na ağoden, txomuroni froxtepe na dobğaps do nunk’us nişani na naşkumers, daçxironi, monk’a do nak’limoni zabunoba ren. Berepes umosi dido ağoden. Zabunobaşi virusi; yarapeş doloxe iqven do zabuniş porçapete, zabunişa nanç’ute, mç’acepete do virusoni havaş oşvanute nak’limen. Monç’vaşi p’eriodi muşi 10- 14 dğa naqonops. Arçeri do k’ap’et’i nişanepete na geç’k’aps zabunobas; tişi do cinikişi 3’k’uni, ontxoru, adaleşi ok’ap’et’inu do 40 °C k’onari t’u3anoba iqven. 3- 4 dğaloni moç’k’aş p’eriodiş k’ule xura imç’itanen do t’u3anoba im3ikanen. 3’oxle nunk’us do ok’ule tis, ubas, cinikis, xanç’ali do t’rik’epes k’ap’et’i froxtepete mç’ita lekepe yeçkindun. Doloxe mutepeşi 3’k’arite yopşa iqven, emuşk’ule p’up’uzi steri ceraxat’işa konikten. T’u3anoba am oras xolo imağalen. 12. dğas p’up’uzepe t’k’va3un, 16. dğasti p’up’uzepeş jin iker3elen. 2. do 3. dolonepes ker3elape orome naşkumenan do melapan.
Zabunobaşi seyri çkvaneri iqopen; emuşeni sum ç’eşidi pukiriş zabunoba itarifen: Perpu t’ip’is, p’up’uzepe artikartişen ok’o3’k’eri ren do zabunobaşi seyri k’ai iqven. K’onfluani t’ip’is, p’up’uzepe ok’oinç’enan do apsepe yoçkindapan, zabunobaşi seyri p’at’i iqven. Hemorajik’i t’ip’is p’up’uzepes, muk’ozapes do tolişi k’onjonkt’ivas odi3xiru na iqven irişen monk’a do oğuroni t’ip’i ren.
Pukiriş zabunobas muayeni ar şvela var uğun. Mcveşoras dido na imralet’u do uk’ore3xu adami na oğurinapt’u pukiriş zabunobaşen moçitu şeni ilemşinen. Serumiş mek’idu, t’u3anobaş om3ikanu do 3’k’uniş mek’olapuşi ç’amepeş meçamu steri omxvaconi şvelape ixvenen. Olemşuk 1- 20 3’anaş oşkendas na iktiren naxondinu meçaps. Toma muşi na iç’k’iren zabuni kodoinciren do t’k’ebi muşi %1 p’ot’asyumi p’ermanganat’i k’ala ibonen. Edo xolo nunk’uş manişa manişa obonu do tolepeş oçvu uk’ors. Zabunis 6 doloni k’arant’ina unon. Pukiriş zabunobaş k’ule bakt’erialuri infek’sioni var yeçkindas yado ant’ibiot’ik’iş oxmaru unon. Ç’amoni şvela ixvenet’aşi zabunis na nanç’u adamepeti ilemşinasunon do ixosarinasunon.
|
TÜRKÇE
